Қрим кўпригига Америкада ишлаб чиқарилган ATACMS ракеталари ёрдамида ҳужум уюштирилди

Россия Мудофаа вазирлиги 16 август куни Қрим кўпригига Американинг ATACMS ракеталари ёрдамида ҳужум уюштирилганини маълум қилди.

«Бугун кечаси ҳаво ҳужумидан мудофаа воситалари ёрдамида АҚШда ишлаб чиқарилган ATACMS тезкор-тактик ракеталари орқали Қрим кўпригига уюштирилган 12 та ҳужум қайтарилди. Ракеталарнинг барчаси йўқ қилинди», — дейилади вазирлик хабарида.

Бундан олдин Мудофаа вазирлиги россиялик ҳарбийлар Қримда кечаси Украинанинг бешта учувчисиз бошқариладиган учиш аппаратини тутиб қолгани ва Қора денгизда иккита экипажсиз катерни яксон қилганини билдирганди.

Тасдиқланмаган маълумотларга кўра, ҳужум Керч портига уюштирилган, шунингдек, шаҳарга ракета қолдиқлари келиб тушган. Ҳужум вақтида Қрим кўприги тўрт соатга ёпиб қўйилган, мониторинг каналлари кўприк атрофида саккизта ракета уриб туширилгани ҳақида хабар берган.

Украина Қуролли кучлари мазкур ҳолат бўйича ҳозирча ҳеч қандай изоҳ бермади.

CNN телеканали 15 август куни АҚШ Украина Қуролли кучлари томонидан Курск вилоятига узоқ масофага мўлжалланган Америка қуроллари ёрдамида зарбалар амалга оширилишига рухсат беришни хоҳламаётганини маълум қилганди. Чунки АҚШ Украинага у қадар кўп ATACMS ракеталардан етказиб бера олмайди. Суҳбатдошларнинг айтишича, Америка ҳукумати Украина мавжуд ракеталарни аннексия қилинган Қримга зарбалар беришда фойдаланишини истамоқда.

Эслатиб ўтамиз, 2022 йил 8 октябрь тонгида Керч бўғози орқали ўтувчи темирйўл кўпригида портлаш рўй бериши оқибатида автомобиль кўпригининг бир қисми қулаб тушган эди. Ўшанда ёнилғи тўлдирилган бир неча цистерналар ёниб кетган, кўприк бўйлаб автомобиль ва поездлар ҳаракати вақтинча тўхтатилганди.