Ҳиндистон бош вазири Украинада тинчликка қайтишга чақирди

Ҳиндистон бош вазири Нарендра Моди Украинага ташрифи олдидан «тинчликка қайтиш»га чақирди. «Биз дўст ва ҳамкор сифатида минтақада тинчлик ва барқарорлик тезроқ қайтишига умид қиламиз», — деб ёзди Моди 21 август, чоршанба куни Х ижтимоий тармоғидаги саҳифасида. 23 август куни Полшага сафаридан сўнг Моди Украинага ташриф буюради.

Ҳиндистон бош вазири, шунингдек, Киевга ташрифни «аввалги суҳбатлар мавзуларини ишлаб чиқиш» учун имконият деб атади. Шу билан бирга, у президент Володимир Зеленский билан «ҳозирги Украина можаросини тинч йўл билан ҳал этиш истиқболлари» ва «Ҳиндистон-Украина дўстлигини чуқурлаштириш» ҳақида гаплашмоқчи», дейилади хабарда. 

Ташриф доирасида Украина ва Ҳиндистон ўртасида қатор ҳужжатлар имзоланиши кутилмоқда. Бу Модининг 30 йил аввал дипломатик муносабатлар ўрнатилганидан бери Украинага илк ташрифи. 

8-9 июл кунлари Ҳиндистон бош вазири Россияга расмий даражада ташриф буюриб, у ерда Россия президенти Владимир Путин билан музокаралар ўтказди. 

Ҳиндистон ҳозирча Россиянинг Украинага ҳужумини қоралашдан тийилган ва бунинг ўрнига уришаётган томонларни мулоқотга чақирган. Совуқ уруш давридан бери мамлакат Россия билан яқин муносабатларни сақлаб келмоқда. Шу билан бирга, Ҳиндистон Ғарб билан хавфсизлик соҳасида ҳамкорликка интилмоқда ва рақобатчи бўлган Хитойга қарши қўллаб-қувватловга эга бўлмоқчи, дея таъкидлайди AFP.