iPod’дан AirPods Мах’гача. Apple қандай қилиб қулоқчинлар бозорини эгаллади?

Деярли чорак асрдан бери Apple қулоқчинлар бозорида етакчилардан бири бўлиб қолмоқда. Компания ишни оддий, аммо нафис моделдан бошлаган. Ундан кейин тажрибалар ўтказилди ва хатолар устида ишланди. Ҳар бир янги қулоқчин технология оламида шов-шувга айланди.

Илк қулоқчинлар

Ҳаммаси iPod билан бошланган. Apple’нинг машҳур плеери 2001 йилда чиқарилган ва рақобатчилар орасида нафақат дизайни балки оқ қулоқчинлари билан ҳам ажралиб турарди.

Бундай ранг 2000 йилларнинг бошига хос эмасди, одатда қулоқчинлар қора рангда ишлаб чиқарилган. Оқ рангга компания раҳбари Стив Жобс бошида қарши бўлган.

Ранг Apple дизайнери Жони Айв томонидан танланган бироқ, Жобсни оппоқ ранг қониқтирмасди, натижада унга кулранг аралаштирилди. Қулоқчинларнинг пастки қисми ва сими шу рангга бўялди.

Қулоқчинлар сенсорли бошқарув қаторида iPod’нинг рамзига айланди.

Вакуумли қулоқчинлар

Apple’нинг дастлабки қулоқчинлари анча оддий эди. Уларда товуш изоляцияси бўлмаган. Компания 2004 йилда янада юқори даражадаги версияни тақдим этди.

Янги модел “тиқинлар” форматида ишлаб чиқарилди. Қулоқчинларга резина қопламалар ўрнатилди. Улар ташқи шовқинни камайтириб, овоз сифатини яхшилади. Қулоқчинлар конусга ўхшаган ғайриоддий кўринишда эди. Фойдаланувчилар эса бундай конструкция қулоқда қулай турмаслигидан шикоят қилишган.

Оддий қулоқчинлар iPod’га қўшиб сотилган бўлса, янги модел алоҳида — 39 долларга сотилди. Янгилик анча мунозарали бўлиб чиқди ва бозорда атиги тўрт йил “яшади”.

Apple вакуум қулоқчинларнинг яхшиланган версиясини 2008 йилда тақдим этди. Қулоқчинларга иккинчи динамик қўшилди. Улардан бири юқори частотали товушларни, иккинчиси қолганларини ижро этарди. Бундай қарор тингловчиларга маъқул бўлди. Чиқарилган пайтда қулоқчинлар Apple тарихидаги энг яхшиси деб аталди. Аммо улар арзон бўлмаган — 79 доллар.

Янгиланган версия

2007 йилда биринчи iPhone пайдо бўлиши билан қулоқчинларнинг одатий версияси ҳам ривожланди. Дизайн анча силлиқлашди — динамик яхшиланди. Шунингдек, қулоқчинларга микрофон билан бошқариш пулти қўшилди. Лекин унда фақат битта тугма бор эди.

Бундай версия 2009 йилда чиқарилган. Қулоқчинларни бошқарадиган марказий тугма кўп функцияли бўлиб, кейинги қўшиққа ўтиш учун икки марта, аввалги қўшиққа қайтиш учун эса уч марта босиш керак эди.

Янгиланган аксессуар учинчи авлод iPod Shuffle плеери эгалари учун жуда зарур қурилмага айланди. Apple таваккал қилиб, тугмасиз кичкина гаджет ясаган: плеерни фақат қулоқчинлар орқали бошқариш мумкин эди.

Bluetooth гарнитура

Биринчи iPhone чиқиши билан Apple ўзининг илк симсиз қулоқчинларини ҳам намойиш этди. Аниқроғи, битта қулоқчин — Bluetooth гарнитура чиқарилди.

Бу сафар оқ рангдан воз кечилди. Гарнитура ишбилармонликка хос стилда қора рангда эди. Нафисликка путур етказмаслик учун гаджетнинг қулоғига ёй ёки бошқа қўшимча ушлагич ўрнатилмаган. Бу эса қулайликка салбий таъсир қилди — изоҳларда наушник осон тушиб кетиши мумкинлиги таъкидланди.

Гарнитура бир заряд қилинганда беш соатча ишларди. Аксессуар iPhone смартфонларининг биринчи версиясига тушадиган зарядлагич ёрдамида қувватланган.

Гарнитура 129 долларга сотилган. Кейинроқ нарх 99 долларга туширилди. 2009 йилда эса гаджет сотувдан олиб ташланди. Apple тарихида бошқа бундай гарнитуралар бўлмади.

EarPods

Apple симли қулоқчинларнинг охирги версиясини 2012 йилда чиқарган. iPhone 5 билан бирга компания EarPods’ни тақдим этди.

Қулоқчинлар эски форматида қолди, лекин улар янги, ғайриоддий шаклда чиқарилди. Улар юмалоқ эмас, балки чўзинчоқроқ қилиб ишланган. Динамик эшитиш канали ичкарисига йўналтирилди. Бундай шакл нафақат товушни яхшиларди, балки тақиб юриш учун анча қулай эди. Қурилма қулоқ ичида яхшироқ турарди.

Изоҳларда қулоқчинлар 29 долларлик нарх учун анча яхши экани айтилди. Журналистларга ҳам оддий фойдаланувчиларга ҳам қурилмадаги кучли басс ва овоз тиниқлиги ёқди.

2020 йил кузидан бошлаб EarPods’ни iPhone тўпламига киритиш тўхтатилди. Аммо наушниклар ҳалигача учта вариантда — Lightning, USB-C ёки 3,5 мм ўлчам билан сотилади.

AirPods

Apple симсиз қулоқчинлар бозорига кенг миқиёсда ўрнашди. AirPods 2016 йил сентябр ойида iPhone 7 билан бирга тақдим этилган. Қулоқчинлар учун EarPods дизайни асос қилиб олинди, фақат батарея туфайли “оёқлар” узайтирилди. Зарядлаш учун кичикроқ ўлчамдаги оқ ғилофдан фойдаланиш бошланди.

Жони Айвнинг сўзларига кўра, AirPods’ни яратишда у “Юлдузлар жанги” филмлар сериясидан илҳомланган. Айниқса, қора элементлар ўрнатилган оқ костюмдаги ҳужумчиларнинг ташқи кўриниши дизайнга таъсир кўрсатган.

AirPods 159 долларга сотила бошлади. Нарх компаниянинг асосий рақобатчилари билан солиштирганда пастроқ эди. Атиги уч ҳафта ичида AirPods дунёдаги энг кўп сотилган симсиз қулоқчинларга айланди ва бозорнинг 26 фоизини эгаллади. Apple ҳанузгача етакчи бўлиб қолмоқда.

AirPods’нинг энг катта ютуғи қурилмаларнинг кетма-кет алмашинуви бўлди. Уларни Аpple’нинг исталган техникасига дарҳол улаш мумкин. Лаконик қулоқчинлар кўпчилик фойдаланувчилар учун қулай бўлиб чиқди. Шундай бўлса-да, AirPods қулоқдан тушиб кетган ҳолатлар ҳам бўлган. Apple танқидни эшитди ва кейинги версияда муаммони ҳал қилди.

AirPods Pro

Қулоқчинларнинг такомиллаштирилган версияси 2019 йилнинг кузида тақдим этилди. Муҳандислар унинг шаклини ўзгартирди. “Оёқлар” калталанди, динамика охирига резина насадка қўшилди. Комплект таркибига турли ўлчамдаги амбушюралар киритилди.

Янги версиянинг яна бир хусусияти шовқинни фаол бостиришида эди. Микрофон ёрдамида қулоқчинлар атрофдаги товушларни бутунлай тозалайди.

Чиқарилиш пайтида AirPods Pro 249 долларга сотилган. 2022 йилда иккинчи авлод қулоқчинлари учун ҳам шу нарх сақлаб қолинди. Янгиланган версияда шовқин янада камайтирилиб, овоз яхшиланди.

Ушбу қулоқчинлар стили 2021 йилда стандарт AirPods нинг учинчи авлодини ҳам илҳомлантирди. Аммо кичик модел резина амбушюрларсиз ва шовқин бостиргичсиз қолдирилди.

AirPods Max

iPod чиққанидан деярли 20 йил ўтгач, Apple ўзининг биринчи тўлиқ ўлчамли қулоқчинларини тақдим этишга қарор қилди. AirPods Max сотувга 2020 йил декабр ойида чиқарилган.

Янги қурилма симсиз бўлиб, хоҳишга кўра қулоқчинларга кабель улаш мумкин, лекин фақат оригиналидан. Бироқ бундай режимда барибир гаджетнинг қуввати кетади, бир вақтнинг ўзида ҳам кабелда тинглаш ҳам қувватлаш мумкин эмас.

AirPods Мах’га шовқин бостиргич ва бошқа машҳур функциялар қўшилди. Танқидчиларга қулоқчинлар ёқди, лекин нархи борасида бундай деб бўмайди. Улар 549 доллар туради. Шунга қарамай журналистлар AirPods Мах’ни ўз тоифасидаги энг яхши қурилма деб атади.