Дуровнинг «сирли акаси» ҳам қидирувга берилган. «Соядаги даҳо» ҳақида нималар маълум?

Павел Дуров билан бирга унинг акаси Николай Дуровга ҳам Франция ҳуқуқни муҳофаза қилувчи идоралари қидирув эълон қилган. Француз полицияси Николай Дуровни Телеграм ҳаммуассисларидан бири сифатида кўрсатган.

Иш ҳужжатлари билан эксклюзив танишиб чиққан Politico нашри ҳужжатларга таяниб ёзишича, Николай Дуровга ҳам укаси билан бирга шу йилнинг 25 март санасида қидирув эълон қилинган. Ака-укалар болалар порнографиясини тарқатиш ва сақлаш жиноятида шерикликда айбланмоқда.

Франция ҳукумати болалар билан боғлиқ жиноий қилмишни содир қилган шахсни аниқлаш бўйича Телеграмга сўров юборган. Лекин мессенжер эгалари бунга жавоб бермаган. Бундан ташқари, айбловлар қаторида мессенжер эгалари бошқа жиноий қилмишларни содир қилган шахсларни аниқлашда ҳам Франция ва Евроиттифоқ мамлакатлари билан ҳамкорлик қилмагани айтилмоқда. Шундан сўнг француз полицияси уларга нисбатан махфий суриштирув жараёнларини бошлаган.

Ҳужжатда «ака-ука Дуровларнинг терговда аниқланган ноқонуний ҳаракатларга бевосита алоқадорлиги ҳақида ҳеч қандай маълумот йўқ, дейилади Politoco мақоласида.

Бундан ташқари, тергов ҳужжатларида Телеграм вице-президенти Иля Перекопский исми ҳам тилга олинган, лекин уни ҳибсга олишга ордер берилгани ёки бошқа айблов қўйилгани ҳақида маълумот йўқ.

Павел Дуровнинг адвокати ҳодисага изоҳ беришдан бош тортди.

Шунингдек, Париж прокуратураси ҳам иш махфий юритилаётгани учун ака-укаларга доир иш юзасидан изоҳ бермаган. Ҳибс учун ордер — тергов бошлаш учун асос бўладиган, Телеграм ёрдамида содир қилинган турли жиноятлар учун берилгани маълум қилинган. Прокурорга кўра, терговнинг бу босқичида фақат Павел Дуров сўроқ қилинмоқда.

Николай Дуров ким?

Николай Дуров – Телеграм асосчиси Павел Дуровнинг акаси, ундан 4 ёш катта. Улар биргаликда «ВКонтакте» ижтимоий тармоғини, кейинроқ Телеграмни яратишган. Николай иккала лойиҳанинг техник тарафларига жавобгар бўлгани айтилади.

44 ёшли Николай ёшлигида гений, дея эътироф қилинган. Улар СССРнинг қайта қуриш йилларида Италияда яшаган ва 1990-йилларга келиб Россияга қайтган. Кичик Дуров америкалик журналистга берган интервюсида айнан Италиядан олиб келинган компютери ҳақида эслаган.

Николай 1996-1998 йилларда математика бўйича халқаро олимпиада ғолиби бўлган. Аввал Санкт-Петербург, кейин Бонн университетларида ўқиган. Математика бўйича докторлик даражасига эга.

2006 йилда Николай «ВКонтакте»ни ишга туширишда укасига ёрдам бериб, компания директорининг техник ёрдамчиси бўлган, Телеграмга эса у «юрагини берган». Айнан Николай 2013 йилда ишлаб чиққан маълумотларни шифрлаб узатиш протоколи Телеграм мессенжери учун асос бўлган. Дастлаб мессенжердан ака-укалар ўзлари суҳбатлашиш учун фойдаланган. Кейинроқ у тўлиқ янги лойиҳага айланиб кетади. Катта Дуров кейинроқ TON ва Telegram Open Network'ни ҳам ишлаб чиқди.

Николай Дуров укасининг бизнесидан чиқиб, ўзини бутунлай илм-фанга бағишлагани айтилади. У 2024 йил август ҳолатига Россия фанлар академияси Математика институтининг Санкт-Петербург бўлимида катта илмий ходими сифатида рўйхатда мавжуд. У 2015 йилдан бошлаб Петербургда ота-онаси билан бирга яшаган, Павел билан кам кўришган. Николай айни вақтда қаердалиги номаълум.