Цукерберг пандемияда Оқ уйнинг Meta’га босими ҳақида маълум қилди

Meta корпорацияси раҳбари Марк Цукерберг Оқ уй томонидан COVID-19 пандемияси даврида ўз компаниясига босим ўтказилганини эълон қилди. АҚШ президенти Жо Байден маъмуриятининг юқори мартабали амалдорлари Facebook’даги коронавирус билан боғлиқ айрим контентни «цензурадан ўтказишни» талаб қилишган, деди у 27 август, сешанба куни тарқатилган АҚШ Конгресси Вакиллар палатасининг Адлия қўмитаси раиси Жим Жорданга йўллаган хатида. 

Цукербергнинг сўзларига кўра, амалдорлар бир неча ой давомида Facebook’дан «COVID-19 билан боғлиқ баъзи контент, жумладан, ҳазил ва киноя»ни олиб ташлаш ёки чеклашни сўраб келган. Компания буни қилишдан бош тортганида, улар «жиддий норозилик билдиришди», дея қўшимча қилди у. 

Цукерберг ҳукумат босимига қарши курашишга ваъда берди 

«Ҳукумат босими нотўғри бўлган деб ўйлайман ва биз бу ҳақда кўпроқ гапирмаганимиздан афсусдаман», деб ёзган Цукерберг 26 августдаги мактубида, шунингдек, ўзининг X саҳифасида. 

Мета раҳбари ўз корпорациясининг бу борадаги баъзи қарорлари нотўғри бўлган бўлиши мумкинлигини тан олди ва компания келажакда бундай босимга қарши курашишига ваъда берди. 

2021 йил август ойида Meta корпорацияси COVID-19 ҳақидаги нотўғри маълумотлар туфайли Facebook ва Instagram ижтимоий тармоқларидаги 20 миллиондан ортиқ постларни ўчириб ташлашини эълон қилди. Бундан ташқари, вакциналар ҳақидаги фейкларни тарқатишда гумон қилинган юзлаб аккаунтлар ўчирилгани маълум қилинган.