Украинада 365 та таълим муассасаси бутунлай вайрон бўлди

Россиянинг Украинага қарши ҳарбий ҳаракатлари натижасида ҳозирда 3798 та таълим муассасаси ўқ отиш ва бомбардимонлардан зарар кўрган, улардан 365 таси бутунлай вайрон қилинган. Бу ҳақда Украинада ўқув йилининг биринчи куни, душанба, 2 сентябрда Олий раданинг инсон ҳуқуқлари бўйича вакили Дмитрий Лубинец маълум қилди. Унинг таъкидлашича, Россия «у ерда болалар бўлиши мумкинлигини билса-да, таълим муассасаларини: болалар боғчалари, мактаблар, университетларни атайлаб нишонга олмоқда».

Украина омбудсманининг таъкидлашича, бутун дунё бўйлаб талабалар таълим олаётган бир пайтда украиналик болалар бошпаналарда қолишда ва масофадан туриб ўқишга мажбур. «Бунга дунё яна қачонгача кўз юмади?! Қачонгача жиноятчилар болаларнинг таълим олиш ҳуқуқларини поймол қилади?! Душманни тўхтатишимиз керак!» - дея Лубинец ғарб давлатлари ҳукуматларига мурожаат қилди.

Украина: сафарбарлик қуролли кучларга чақирувни 2,5 баробар оширди 

Украина мудофаа вазирлиги сафарбарлик тўғрисидаги янги қонун туфайли Украина қуролли кучлари захираларининг сезиларли ўсишини қайд этди: ҳарбий хизматга мажбур бўлганларни чақириш кўрсаткичлари биринчи чоракка нисбатан 2,5 баробар ошди, Бу ҳақда 30 август куни Украина мудофаа вазирлиги матбуот хизматига таяниб, Украинанинг «Телеграф» нашри хабар берди.

«Украинанинг 2024 йил 11 апрелдаги 3633-IX-сонли қонунининг кучга кириши бизга сафарбарлик даврида ҳарбий хизматга мажбур бўлганларни муддатли ҳарбий хизматга чақириш даражасини жорий йилнинг биринчи чорагига нисбатан 2,5 баробар ошириш имконини берди. Умуман олганда, бу ушбу босқичда ҳарбий қисмларни ўз вақтида тўлдириш, уларнинг жанговар қобилиятини тиклаш ва зарур захираларни яратиш имконини яратади», — деб хабар қилди вазирлик «Телеграф» нашрига.

Бугунги кунга келиб, сафарбарликни кучайтириш режалаштирилмаган. Матбуот хизмати хабарида айтилишича, агар ҳарбий тайёргарликдан ўтган жангчилар етарли миқдорда бўлса ва чақирув муваффақиятли ўтса, ҳарбий раҳбарлик барибир ротация ва демобилизация, яъни ҳарбий ҳолат даврида айрим тоифадаги ҳарбий хизматчиларни ишдан бўшатиш бўйича қонунчиликка ўзгартиришлар тайёрлайди.