Столтенберг: Украинадаги тинчлик АҚШ кафолатларини ўз ичига олиши керак

Украинадаги урушни тугатиш бўйича ҳар қандай музокаралар бу давлат учун Ғарб ва биринчи навбатда АҚШ томонидан хавфсизлик кафолатларини ўз ичига олиши керак, дейди 1 октябр куни НАТО бош котиби лавозимини тарк этган Йенс Столтенберг. Украинада Ғарб кафолатларисиз тинчлик ўрнатиш Россиянинг харитадаги ҳеч қандай чизиққа риоя қилмаслигига олиб келади, деди Столтенберг кеча, мудофаа алянси бошқарувидаги сўнгги кунида Reuters агентлигига.

«Ҳар қандай чизиқ келишилганида – хоҳ халқаро миқёсда тан олинган чегара бўладими, хоҳ бошқа ўт очишни тўхтатиш чизиғи бўладими, биз уруш шу ерда тугашига мутлақо амин бўлишимиз керак», деди у. Сиёсатчи 2014 йилда Россия агрессияси бошланганидан сўнг Украина шарқида ўт очишни тўхтатиш бўйича олдинги келишувларни эслади, Россия бу агрессияга чек қўймай, яна ҳужумга ўтди.

Столтенбергнинг сўзларига кўра, Ғарб Россия президенти Владимир Путиннинг Украинага нисбатан позициясини ўзгартира олмайди. «Аммо менимча, агар биз урушни давом эттириш нархи шунчалик юқори эканлигини кўрсатсак, унинг ҳисоб-китобларини ўзгартиришимиз мумкин, шунинг учун у ўтириб, Украинани суверен мустақил давлат сифатида қабул қилгани маъқул», — дея таъкидлади у.

РФ таҳдидлари туфайли Украинани қўллаб-қувватлашдан бош тортмаслик

Шу билан бирга, Столтенберг НАТОни «Россия ядровий риторикаси туфайли» Украинага кейинги ҳарбий ёрдамдан бош тортмасликка чақирди. «Ҳар сафар биз янги турдаги қуроллар – жанговар танклар, узоқ масофали ракеталар ёки F-16 қирувчи самолётлари билан қўллаб-қувватлашимизни оширганимизда, руслар бизни тўхтатишга ҳаракат қилади», деб эслайди у.

Шу билан бирга, Россия таҳдидлари муваффақият қозонмади ва Путиннинг ядровий қурол ҳақидаги сўнгги баёнотлари НАТОнинг Украинани қўллаб-қувватлашига тўсқинлик қилмаслиги керак, дея қўшимча қилди норвегиялик сиёсатчи. Шунингдек, у НАТО учун энг катта хавф Россиянинг Украинага қарши урушдаги ғалабаси эканлигини таъкидлади.

Рютте: Украинани қўллаб-қувватлаш - НАТОнинг устувор вазифаси

Марк Рютте 1 октябр куни НАТО бош котиби лавозимига киришди. НАТОнинг Брюсселдаги штаб-квартирасида ўтказилган маросимда у ўзидан олдинги Йенс Столтенбергнинг лавозимини эгаллади. Рютте Украинани қўллаб-қувватлаш ва Россияни тийиб туришни ўзининг асосий устувор йўналишлари деб атади.

«Биз (алянсга аъзо давлатлар) кўпроқ маблағ сарфлашимиз керак (мудофаа учун). Биз ўз жамоавий хавфсизлигимизни мустаҳкамлашимиз керак», — дея янги бош котибнинг сўзларини келтиради AFP агентлиги. «НАТОнинг асосий вазифаси ўзгармайди: биз ўз одамларимизни, халқларимизни ва, албатта, қадриятларимизни ишончли ҳимоя қилишимиз керак», — дея таъкидлади Рютте.

У, шунингдек, ноябр ойида бўлиб ўтадиган АҚШ президентлик сайловларида ким ғалаба қозонишидан қатъи назар, у Доналд Трамп ёки Камала Ҳаррис бўладими, иккаласи билан ишлай олишини айтди. Марк Рютте Трамп билан 2017 йилдан 2021 йилгача, яъни у Оқ уй эгаси бўлганида бирга ишлаганини эслади. «У (Трамп) бизни кўпроқ маблағ сарфлашга мажбурламоқчи эди ва у муваффақиятга эришди: биз ҳозирда у лавозимга келган вақтга қараганда анча юқори харажатлар даражасидамиз», — деди Рютте. У Камала Ҳаррисни «висе-президент сифатида фантастик рекордга эга» «юқори ҳурматли» сиёсатчи деб атади.