Apple янги қурилмаларни ҳар йили чиқаришни тўхтатади — ОАВ

Apple асосий маҳсулотлар линейкасидаги йиллик янгиланишлар билан мижозларни хурсанд қилмоқда. Одатда, Америка IT гиганти июн ойида ўзининг янги дастурий таъминотини намойиш этади, сентябр янги iPhone ва Apple Watch учун, октябр эса Mac ва iPad учун ажратилган.

Аммо Bloomberg нашрининг таниқли инсайдери Марк Гурман сўзларига кўра, бу цикл тез орада ўзгариши мумкин. Apple ўз маҳсулотларини, шу жумладан iPhone смартфонларининг чиқариш усулларини қайта кўриб чиқмоқда.

Гурманнинг таъкидлашича, йиллик янгиликларга бўлган зарурат ишлаб чиқувчиларга ортиқча босим ўтказади. Натижада, Apple янги функцияларни жорий этиш ва қурилмалари сифатини таъминлашда қийинчиликларга дуч келмоқда. Масалан, «Сунъий интеллект (Apple Intelligence) учун нолдан ясалган биринчи смартфон» деб ваъда қилинган iPhone 16 ушбу функцияларга эга бўлмади. Уларнинг пайдо бўлиши октябр ойи охирига қолдирилди.

Гарчи компания ҳар йили янги iPhone чиқаришни давом эттирса-да, «янги дастурий таъминот хусусиятларига қурилмани мослаштириш» учун iPhone тақдимотини бир ой кейинга кўчириши мумкин.

Бошқа маҳсулотларга келсак, икки йиллик янгиланиш даврига босқичма-босқич ўтиш аллақачон бошланган, деб ҳисоблайди Гурман. Масалан, бу йил Ultra 3 соатини чиқариш ўрнига, Apple шунчаки Ultra 2 учун янги қора ранг қўшди. Компания, шунингдек, Apple Watch SE бюджет соатини ҳам янгиламади. Бу эътиборни янги дизайн ва янги хусусиятларга эга бўлган юбилей 10-серияга қаратди.

Гурман фикрига кўра, қуйидаги маҳсулотлар энди ҳар йили ишлаб чиқарилмайди: барча iPad моделлари, Apple Watch SE, Apple Watch Ultra, Mac Studio, Mac Pro, iMac, Mac mini, iPhone SE.

Morgan Stanley томонидан эълон қилинган сўнгги ҳисобот шуни кўрсатдики, iPhone 16 сўнгги 5 йил ичида талаб пасайган биринчи авлод бўлди. Шу муносабат билан Apple йўқотишларга йўл қўймаслик учун янги смартфонларга буюртмалар ҳажмини камайтириши мумкин.