Марк Рютте Украинани НАТОга қабул қилиш муддатини очиқламади 

НАТО бош котиби Марк Рютте Украинани алянсга қабул қилиш бўйича аниқ муддатни айтмади. 16 сентябр, чоршанба куни Брюсселда бўлиб ўтган матбуот анжуманида у НАТОнинг Вашингтондаги аввалги саммити якунлари бўйича ишлаб чиқилган резолюцияга ишора қилди, хусусан, Киевнинг евроатлантик интеграцияси йўлининг «қайтариб бўлмаслиги» ҳақида гапирди.

«Вашингтонда НАТО Украина учун НАТО аъзолигига йўл очишга (ортга қайтариб бўлмайдиган тарзда), қарор қилди», дея ахборот агентликлари Рютте сўзларидан иқтибос келтирмоқда. Унинг қўшимча қилишича, «келгуси қадамларни қандай қўйиш ва уларни қандай қилиб муваффақиятли қилиш»ни тушуниш учун иттифоқчилар ва Киев билан «яқиндан алоқада» бўлиб турибди.

НАТО бош котиби: Алянс Киевни қўллаб-қувватлашда давом этади

НАТО Россия таҳдидларидан қўрқмайди ва Россия босқинидан ўзини ҳимоя қилаётган Украинани қўллаб-қувватлашда давом этади. Бу ҳақда НАТО бош котиби Марк Рютте 14 октябр куни Германиянинг Висбаден шаҳридаги НАТОнинг Украина учун (NATO Security Assistance and Training for Ukraine - NSATU) миссияси штаб-квартирасига ушбу лавозимдаги биринчи ташрифи чоғида маълум қилди.

«Бизнинг (Россия президенти Владимир Путинга) хабаримиз шундан иборатки, биз у ўз мақсадига эришмаслиги учун давом этамиз, Украина ғалаба қозониши учун зарур бўлган ишни қиламиз», — деди Рютте Reuters агентлиги ва Германиянинг Hessischer Rundfunk медиакомпаниясига берган интервюсида.

Reuters агентлигининг қайд этишича, кўпчилик НАТО бош котибининг Украинани собит қўллаб-қувватлаши ҳақидаги баёнотларини Шимолий Атлантика алянсини танқид қилиши билан танилган собиқ давлат раҳбари Доналд Трампнинг АҚШ президенти лавозимига сайланиши мумкинлиги контекстида баҳоламоқда.

Марк Рютте Украинани қўллаб-қувватлаш миссиясининг Висбадендаги штаб-квартирасига ташриф буюрган куни Германия мудофаа вазири Борис Писториус ҳам у ерда бўлган. У НАТО бош котиби билан ёпиқ эшиклар ортида музокаралар олиб борди, деб ёзади HR ўз веб-сайтида.