Олимлар ОИВ билан касалланган одамлар ўртасида буйрак кўчириб ўтказиш хавфсизлигини исботлади

АҚШнинг Жонc Ҳопкинс университети олимлари бошқа илмий муассасалардаги ҳамкасблари билан ҳамкорликда ОИВ инфекциясига чалинган донордан бошқа ОИВ беморга буйрак кўчириб ўтказиш хавфсиз эканини аниқлади. Бу жараён бемор саломатлигига қўшимча хатар туғдирмаслиги маълум бўлди. Тадқиқот New England Journal of Medicine (НЕЖМ) илмий нашрида чоп этилган.

Мутахассисларнинг хулосаси буйрак кўчириб ўтказиш жарроҳлигини ўтказган 198 нафар катта ёшли ОИВ беморлар маълумотларига асосланади. Уларнинг ярми аъзоларни ОИВ билан касалланган донорлардан олган бўлса, қолган ярми соғлом одамлардан қабул қилган.

Умумий яшаш давомийлиги, организмнинг кўчирилган буйракни қабул қилиш ва рад этиши ҳолатлари бўйича натижалар икки гуруҳда ҳам деярли бир хил бўлди.

Трансплантациядан бир йил ўтгач, биринчи гуруҳда беморларнинг яшаб қолиш даражаси 94 фоизни, иккинчи гуруҳда эса 95 фоизни ташкил этди. Уч йилдан сўнг бу кўрсаткичлар мос равишда 85 ва 87 фоизга тенг бўлди.

Олимларнинг таъкидлашича, фақат битта ҳолатда донордан беморга ОИВнинг генетик жиҳатдан фарқланувчи иккинчи штамми юққан, бироқ бу муайян клиник оқибатларга олиб келмаган.

Шу тариқа, тадқиқотчилар ОИВ донорлардан ОИВ беморларга буйрак кўчириб ўтказиш соғлом инсонлардан орган олиш каби хавфсиз, деган хулосага келди.