Исроилда юк машинаси автобус бекатидаги кишиларга бориб урилди

Исроилда 27 октябр, якшанба куни юк машинаси армия ҳарбий базаси яқинидаги автобус бекатида бир гуруҳ одамларни босиб кетди. Қутқарув хизматлари Тел-Авив шимолидаги Рамат-Ҳашаронда содир бўлган фожиада камида 24 киши жабрланганини хабар қилди. Олти киши жиддий жароҳат олди, яна камида 16 киши касалхонага ётқизилди.

Полиция воқеа юзасидан тергов олиб бормоқда. Бошқалар қаторида теракт версияси ҳам ишлаб чиқилмоқда. Юк машинаси тўхташ жойида турган ва йўловчиларни эндигина тушириб юборган автобусга бориб урилган. Полиция хабарига кўра, юк машинаси ҳайдовчиси «зарарсиз ҳолга келтирилган».

Исроил ўтмишда енгил ва юк машиналари иштирокида кўплаб террорчилик ҳужумларига учраган. 27 октябр куни Исроилда Фаластиннинг Ҳамас ҳаракати жангчиларининг кенг кўламли ҳужуми бир йиллиги муносабати билан тадбирлар бўлиб ўтди.

Яқин Шарқдаги кескинлашув

2023 йил 7 октябр куни эрталаб Ҳамаснинг ҳарбий қаноти - «Иззаддин ал-Қассам бригадалари» Исроилга қарши «Ал-Ақсо тўфони» операцияси бошланганини эълон қилди. Ғазо секторидан Исроил томон минглаб ракеталар отилди, қуролли гуруҳлар Исроил аҳоли пунктларига кирди.

Ҳамаснинг билдиришича, операция босиб олинган Шарқий Қуддусдаги Ал-Ақсо масжидига бостириб кириш ва исроиллик муҳожирларнинг фаластинликларга нисбатан зўравонлиги кучайиб бораётганига жавобан амалга оширилган. Бунга жавобан Исроил армияси Ғазо секторида Ҳамасга қарши ўнлаб қирувчи самолётлардан фойдаланган ҳолда «Темир қиличлар» операцияси бошланганини эълон қилди.

Исроил-Фаластин можароси авж олгандан бери 43 мингга яқин фаластинлик ҳалок бўлди. Исроилда қурбонлар сони 1400 дан ошади. Ғазонинг 2,3 миллион аҳолиси Исроилнинг ҳаводан оммавий бомбардимон қилиши ва эксклавнинг тўлиқ блокадаси туфайли озиқ-овқат, сув ва дори-дармонлар танқислигидан азият чекмоқда.