OpenAI ўзининг ChatGPT Search қидирув тизимини ишга туширди

OpenAI компанияси ўзининг ChatGPT Search номли қидирув тизимини ишга туширганини эълон қилди.

Фото: OpenAI

Қайд этилишича, яқин ойлар ичида барча фойдаланувчилар босқичма-босқич ушбу қидирув тизимидан фойдаланишлари мумкин бўлади.

ChatGPT Search чатбот саҳифасида, матн ёзиладиган майдонда пайдо бўлган. У фойдаланувчи учун керакли маълумотни қидиради ва манбага ҳавола таклиф қилади.

Сўров бўйича тайёрланган жавоб фойдаланувчига қулайлик туғдириш мақсадида тартибланган ҳолатда тақдим этилади. Компания қидирув тизими учун фақат ишончли ахборот манбаларидан фойдаланишга ваъда берди.

«Энди ChatGPT интернетда қидирувларни олдингидан кўра сезиларли даражада яхшироқ амалга оширади. Авваллари қидирув тизимига мурожаат қилинган бўлса, энди сиз муҳим саволларга керакли веб-ресурсларга ҳавола берилган ҳолда тезкор жавоб олишингиз мумкин», — дейилади хабарда.

Ҳозирда қидирув тизимидан chatgpt.com расмий сайти ҳамда бир нечта мобил иловалар орқали фойдаланиш мумкин. ChatGPT Plus ҳамда Team’нинг барча фойдаланувчилари уни бугуннинг ўзида ишлатиб кўришлари мумкин. Enterprise ва Edu фойдаланувчиларига эга яқин ҳафталарда шундай имконият тақдим этилади.

#ChatGPT #Қидирув тизими