Абхазияда Россия билан инвестиция келишувига қарши чиққан фаоллар қўлга олинди. Сухумида намойишлар бошланди

Қисман тан олинган Абхазия республикасининг Сухуми шаҳрида Россия билан келишув ратификация қилинишига қарши бўлган мухолифатчилар қўлга олиниши ортидан норозилик намойишлари бошланди. РИА Новости ўз мухбирига таяниб хабар беришича, икки юздан ортиқ намойишчи учта кўприк орқали ҳаракатни тўхтатиб қўйган. 

Октябр ойи охирида Россия иқтисодий ривожланиш вазири Максим Решетников ва Абхазия вице-премьери Кристина Озган Россия компанияларига республика ҳудудида инвестиция лойиҳаларини амалга оширишга имкон берувчи келишувни имзолаганди. 11 ноябр куни Абхазия парламенти мамлакатдаги кўп функцияли комплекслар мақомини тартибга солувчи қонунни қабул қилди, унда Россия-Абхазия келишуви ҳақида ҳам гап кетади. 

Бош прокуратурага кўра, парламент йиғилишидан кейин парламент биноси ҳовлисида турган одамлар гуруҳи депутатлардан бирига нисбатан «ноқонуний ҳаракатлар» содир этган. ТАСС маълумотига кўра, тўрт киши қўлга олинган — парламентнинг собиқ депутатлари Гарри Кокая, Алмасхан Ардзинба, Рамаз Жопуа, шунингдек, мухолифатчи фаол Омар Смир.

Мухолифатдаги «Абхазия миллий бирлиги форуми» партияси раиси Аслан Барциц беш нафар мухолифатчи фаол қўлга олингани ҳақида айтган. «Улар Гудаут районида яқинда имзоланган Россия ва Абхазия ўртасидаги инвестициявий фаолият бўйича келишувга бағишланган йиғилишдан қайтаётганди… уларни қўлга олишган», — деган у ва рўй берган ҳодисани «сиёсий мотивларга кўра таъқиб» деб атаган. 

11 ноябр куни кечқурун Давлат хавфсизлик хизмати (СГБ) биноси ёнида йиғилган намойишчилар ҳибсга олинганларни озод этишни талаб қилишди. Бундан ташқари, намойишчиларнинг бошқа гуруҳи Сухумидан ўтувчи йўллардаги учта кўприкни ҳам тўсиб қўйган. 12 ноябр тонгида митингчилар парламент депутати Беслан Эмурхби ҳамда Очамчирский райони раҳбари Беслан Бигваванинг ҳибсга олинганларни озод қилишга кўмаклашиш тўғрисидаги ваъдаларидан кейин Кодорский кўпригини очишди.

Абхазия президенти Аслан Бжания намойишлар туфайли Хавфсизлик кенгашининг шошилинч йиғилишини ўтказган. Хавфсизлик кенгаши котиби Раул Лолуа мухолифатнинг ҳаракатлари «жиноий характерга эгалиги»ни таъкидлаган. Абхазия ИИВ раҳбари Роберт Киут мухолифат кучлари тарафдорлари республика трассасини, шунингдек, Сухуми ҳамда Гулрипшский районлари ҳудудларида пойтахт атрофидаги йўлларни тракторлар билан тўсиб қўйишганини маълум қилган. У намойишчилар «ИИВ ва ДХХ бинолари дарвозасини бузиб киришга урингани»ни қўшимча қилган. Хавфсизлик хизмати раҳбари Дмитрий Кучберия ДХХ биноси атрофидаги ҳолатни «оммавий тартибсизликлар» деб баҳолаган.  

Абхазиянинг собиқ молия вазири Адгур Ардзинба эса намойишларни «мажбурий чора» деб атаган.

«Бизнинг сафдошларимиз ўз шахсий ишлари эмас, балки миллий манфаатларимизни ҳимоя қилишгани учун ноқонуний қўлга олинди. Бу ерда жуда хоҳлаганидан шундай йўл тутган бирор одам йўқ. Сўнгги беш йил мобайнида мухолифат ҳаракатларини кузатиб борганлар биз ҳеч қачон бу каби акцияларни қўлламаганимизни яхши билишади. Аммо бугунги кунда бу мажбурий чорадир. Биз уларнинг озод этилиши билан кифояланмоқчи эмасмиз. Улар ратификация қилишни хоҳлаётган бу келишувни тўхтатамиз — бу олигархларга чексиз имтиёзлар бериш ва Абхазияни сотиш учун яшил чироқдир», — дея унинг сўзларини келтирган маҳаллий «Республика» телеграм-канали.

РИА Новости хабар беришича, Абхазия ИИВ давлат йўл инспекцияси бошлиғи Дамей Авидзба намойишчилар тўсиб қўйган юқори Гумистинский кўпригига борган. «Одамлар ўз юмушлари билан шуғуллана олмаяпти — бу яхши эмас. Ўйлайманки, [республика] раҳбарияти бунга аралашади. Кодорский кўприги очилгани каби буни ҳам очишади», — деган у. 

Россия элчихонасидагилар Абхазиядаги намойишлар чоғида россияликлар жабрлангани тўғрисида маълумот келиб тушмаганини маълум қилган. Шунингдек, республикада рўй бераётган воқеалар юзасидан россияликлар томонидан оммавий мурожаатлар ҳам йўқлиги қўшимча қилинган.