«Депортация, чегара девори, бекор қилинадиган гуманитар ёрдамлар». Трамп президентлигининг илк кунида нималар қилиши маълум бўлди

АҚШ президентлиги сайловларида ғалаба қозонган Доналд Трамп ўз бошқарувининг биринчи кунида иммиграция назоратини кучайтириш ва амалдаги президент Жо Байденнинг асосий дастурларини тўхтатишга қаратилган «бир қатор ижро чораларини» кўради. Бу ҳақда Reuters агентлиги вазиятдан хабардор учта манбасига таяниб хабар берди.

Суҳбатдошларнинг сўзларига кўра, ушбу чоралар Федерал иммиграция хизматига судсиз кўпроқ инсонларни ҳибсга олиш, қўшинларни Америка—Мексика чегарасига жойлаштириш ва чегара девори қуришни қайта тиклаш имконини беради.

АҚШнинг Мексика билан чегарасида металл девор қуриш режаси Трампнинг биринчи президентлик давридаги асосий мақсадларидан бири эди. Қурилиш 2018 йилда бошланган. Трампнинг ўрнига келган Байден қурилишни тўхтатиб қўйган, бироқ ўтган кузда бу борадаги ишларни қайта бошлаган эди.

Трамп, шунингдек, Байденнинг мигрантларга АҚШ ҳудудига қонуний кириш имконини берадиган гуманитар дастурини тўхтатиш ниятида. Манбалардан бирининг айтишича, иммиграция хизмати депортация ишларида ҳарбий вертолётлардан фойдаланиши ёки бошқа идораларга ёрдам сўраб мурожаат қилиши мумкин.

Reutersʼнинг икки суҳбатдошининг таъкидлашича, Трамп чегарага Миллий гвардия қўшинларини юбориб, ноқонуний иммиграция туфайли мамлакатда фавқулодда ҳолат эълон қилмоқчи. 

Associated Press’нинг эслатишича, Трамп президентлигининг биринчи кунида «жиноятчиларни йўқотиш учун Америка тарихидаги энг катта депорация дастурини» ишга туширишга ваъда берган. Республикачи мамлакатдан 15-20 миллион ноқонуний мигрантларни чиқариб юборишни режа қилган.