Хитойда аёл бир суткада олти марта пластик операция қилинганидан сўнг вафот этди

Хитойлик аёл бир кунда олтита косметик операцияни бошдан ўтказгандан сўнг шифохонада вафот этди. SCMP нашри маълумотларига кўра, унинг оиласи клиникага қарши 168 000 долларлик даъво аризаси билан мурожаат қилган, аммо икки баравар кам пул олган.

2020 йил 9 декабрда Гуанси провинциясидан Лю исмли аёл олтита косметик муолажага ҳақ тўлаш учун банкдан 5,6 минг доллардан ортиқ кредит олиб, Наннин шаҳридаги клиникага келган.

Ўша куннинг ўзида унинг қовоқлари ва бурнини пластик операция қилишган, амалиёт беш соат давом этган. Шундан сўнг аёлнинг сонидан ёғ сўриб олиш муолажаси ўтказилган, эртаси куни эрталаб ўша ёғ юз ва кўкрак соҳасига юборилган. Бу амалиёт ҳам беш соат давом этган.

11 декабр куни Лю касалхонадан чиқди. Аммо лифтга етиб бориши билан ҳушидан кетди. Клиникадагилар унга ёрдам бера олмаганидан сўнг бемор бошқа шифохонага ўтказилди, у ерда кейинчалик унинг вафоти эълон қилинди.

Мурдани ёриб кўриш тўғрисидаги ҳисоботда аёл липосакциядан кейинги асоратлар туфайли ўткир нафас етишмовчилигидан вафот этгани кўрсатилган.

Люнинг саккиз яшар қизи ва тўрт яшар ўғли бор эди. Лю оиласи клиникани судга бериб, 1,18 миллион юан (168 минг доллар) товон пули талаб қилди.

“Клиника менга компенсация сифатида 200 минг юан таклиф қилди. Мен бир одамнинг ўлими учун камида 1 миллион юан тўлаш кераклигини айтдим”, — деди унинг эри. “Уларнинг таклифини рад этиб, судга мурожаат қилишимизни билдирдим”.

2021 йил май ойида суд дастлаб клиникани Люнинг ўлими учун тўлиқ жавобгар деб топди ва 1 миллион юандан ортиқ (140 минг доллар) миқдорида товон пули тўлашни белгилади.

Бироқ клиника апелляция берди. 2023 йилнинг августида суд клиниканинг қисман жавобгарлигини тан олиб, товон пулини 590 минг юангача камайтиришга қарор қилди.

Текширув натижаларига кўра, Люнинг ўлимига унинг шахсий жисмоний ҳолати ҳам сабаб бўлган бўлиши мумкин ва у хавф ҳақида билган. Таъкидланишича, клиника муолажа ўтказиш учун зарур ҳужжатларга эга бўлган, олиб ташланган ёғ миқдори эса тиббий меъёрларга мос келган.