Bloomberg: Буюк Британия бир неча ҳафта олдин Украинага ўнлаб Storm Shadow ракеталарини етказган

Буюк Британия ҳукумати бир неча ҳафта олдин Украинага яна «ўнлаб» узоқ масофага мўлжалланган Storm Shadow ракеталарини етказиб берган. Бу ҳақда Bloomberg агентлиги ўз манбаларига таяниб хабар берди.

Ракеталар етказиб берилгани тўғрисида оммавий равишда эълон қилинмаган. Кир Стармер 2024 йил июл ойида ҳукумат тепасига келганидан бери бу турдаги ракеталарнинг биринчи марта етказиб берилишидир.

Агентлик суҳбатдошларининг сўзларига кўра, Storm Shadow Вашингтон ва Лондон Украинага узоқ масофали ракеталар ёрдамида Россия ҳудудидаги нишонларга зарба уюштиришга рухсат берганидан олдин юборилган. Bloomberg манбалари ракеталар айнан қачон Украинага етиб келгани, шунингдек, уларнинг сони нечта эканини айтишдан бош тортган.

Ноябр бошида The Guardian Буюк Британия маълум муддат Украинага Storm Shadow ракеталарини етказиб бермаслиги ҳақида ёзганди. The Times манбаларига кўра, бу захиралар етишмаётгани билан боғлиқ бўлиши мумкин.

Украина Қуролли кучлари (УҚК) Британиянинг Storm Shadow ракеталари ёрдамида Россия ҳудудида илк бор 20 ноябр куни зарба берди. Курск областидаги Марино посёлкаси аҳолиси ракета қолдиқларига шу куннинг ўзида дуч келган. Storm Shadowʼдан фойдаланиш УҚК Россия ҳудудига АҚШнинг ATACMS ракеталари ёрдамида зарба берганидан бир кун ўтиб содир бўлди.

Россия президенти Владимир Путин 21 ноябр куни Украинанинг Ғарбда ишлаб чиқарилган узоқ масофага мўлжалланган ракеталар билан Россия ҳудудига берилган зарбаларига жавобан Россия нима қилгани ҳақида кутилмаганда батафсил маълумот берди. Хусусан, у Днипродаги «Южмаш» корхонасига «Орешник» экспериментал баллистик тизими орқали уюштирилган ҳужум ҳақида гапирди. РФ президентининг маълум қилишича, Россия ушбу синовни Украина Қуролли кучлари (УҚК) 19 ва 21 ноябр кунлари Брянск ҳамда Курск областларидаги нишонларга ATACMS ҳамда Storm Shadow ракеталари ёрдамида уюштирилган ҳужумга жавоб тариқасида амалга оширган.