Лондон РФнинг «соядаги флоти»га қарши энг катта чоралар пакетини киритди

Буюк Британия ҳукумати Россиянинг «соядаги флоти»га кирувчи яна 30 та кемани санкциялар рўйхатига қўшиб, уларнинг сонини 73 тага етказди. Бу Лондоннинг Россия томонидан фойдаланиладиган танкерлар ва юк кемаларига нисбатан жорий қилган «энг йирик санкция пакети»дир. 25 ноябр, душанба куни Буюк Британия ташқи ишлар вазири Дэвид Лэмми Украинага қарши давом этаётган урушни молиялаштириш учун нефт эмбаргоси ​​ва экспорт товарларига нисбатан бошқа жазо чоралари четлаб ўтилганини айтди.

Рўйхатда, бошқалар қаторида, Россия байроғи остида юрувчи Anatoly Kolodkin, Antarktika, Belgorod, Bratsk, Georgy Maslov, Kemerovo, Kolomna, Krasnoyarsk, Viktor Bakaev каби кемалар ҳам бор. Бундан ташқари, Панама, Габон, Серра-Леоне, Либерия ва бошқа бир қатор давлатлар байроқлари остида сузаётган кемалар қора рўйхатга киритилган.

Россиянинг иккита суғурта компанияси - қора рўйхатда

Бу кемалар бундан буён Буюк Британия портларига кириши тақиқланади ва миллий юк ташиш реестридан чиқарилади. Бундан ташқари, капитанлар ва учувчилар танкерларни ушлаб туриш тўғрисида буйруқ олишлари мумкин. Буюк Британия Ташқи ишлар ва тараққиёт вазирлиги маълумотларига кўра, сўнгги санкцияларга учраган кемаларнинг ярми 2023 йилда 4,3 миллиард долларлик Россия нефти ва нефт маҳсулотларини олиб ўтган.

Шу билан бирга, Россиянинг «АльфаСтрахование» ва «Страховой дом ВСК» суғурта компаниялари «қора рўйхатга» киритилди, улар етарли суғуртасиз юкларни ташишда «соядаги флот»га ёрдам беришда айбланди.