Германияда 13 йил қамоқда ўтириб, айбсиз деб топилган эркак 750 минг евро компенсация талаб қилмоқда

Манфред Гендицкий Бавария федерал ерлари ҳукуматидан моддий зарарни қоплаш эвазига 750 минг евро компенсация талаб қилди. 2022 йилда у қотиллик иши бўйича 13,5 йиллик қамоқдан кейин оқланган ва унга 368 минг евро компенсация тўланган эди.

2010 йилда Мюнхен округ суди Манфред Гендицкийни кекса аёлни ўлдирганлик айбдор деб топиб, умрбод қамоқ жазосига ҳукм этганди. У вафот этган аёл яшаган уйда бошқарувчи бўлиб ишлаган.

Суд ҳайъати айблов томони таъкидлаганидек, Манфред аёлни уриб, ваннада чўктирган деб топган. Кейинроқ экспертлар аёл бахтсиз ҳодиса натижасида ҳалок бўлганини аниқлаган.

2022 йилда Манфред Гендицкий озод этилган ва қамоқда ўтирган 4916 кунининг ҳар бирига 75 евродан компенсация ҳисобланиб, пул тўланган. Аммо эркак ушбу маблағлар етказилган зарарни қоплаш учун етарли эмас дея ҳисобламоқда.

Аввалроқ 52 ёшли америкалик Кристофер Данн 34 йил қамоқда ўтиргач озод этилгани тўғрисида хабар берилганди. Ундан олдинроқ эса Миссури штатида 64 ёшли Сандра Хемм айбсиз деб топилган эди. У 43 йил умрини панжара ортида ўтказган. Штат бош прокурори бу вазиятда ҳам унинг озодликка чиқишига тўсқинлик қилишга уринган, аммо натижа бўлмаган.