Исроил ва «Ҳизбуллоҳ» ўт очишни тўхтатишга келишиб олди

Исроил ва Ливаннинг «Ҳизбуллоҳ» ҳаракати Ливанда ўт очишни тўхтатиш бўйича келишувга эришди. Бу ҳақда 26 ноябр, сешанба куни АҚШ президенти Жо Байден маълум қилди, шундан сўнг Исроил расмийлари сулҳга эришилганини эълон қилди.

Америка етакчисига кўра, Исроил ва «Ҳизбуллоҳ» ўртасидаги сулҳ битими 27 ноябр куни маҳаллий вақт билан соат 04:00 да Исроил ва Ливанда кучга киради. Шартнома шартларига кўра, Исроил мудофаа кучлари (ЦАҲАЛ) бўлинмалари келаси 60 кун ичида Ливан ҳудудини тарк этади.

Вашингтон ва Париж «ўт очишни тўхтатиш келишуви тўлиқ бажарилишини» таъминлашга ҳаракат қилади, деб таъкидлади Reuters Франция ва АҚШ президентларининг қўшма баёнотига таяниб.

Нетаняҳу Исроилнинг «ҳаракат қилиш ҳуқуқини» сақлаб қолади

Сулҳ ҳақидаги хабарларни Исроил бош вазири Бинямин Нетаняҳу тасдиқлади. Исроил Хавфсизлик маҳкамасининг 11 аъзосидан 10 нафари Ливан гуруҳи билан битим тузиш учун овоз берди, деб ёзди сиёсатчи X ижтимоий тармоғида.

Нетаняҳу АҚШга «жараёнга қўшган ҳиссаси» учун миннатдорчилик билдирди, аммо Исроил «ўз хавфсизлигига таҳдид соладиган ҳар қандай таҳдидга қарши ҳаракат қилиш ҳуқуқини» ва «Ҳизбуллоҳ» билан ўт очишни тўхтатиш бўйича келишувга «амал қилиш эркинлигини» сақлаб қолишини айтди. Келишув доирасида Исроил бош вазири, шунингдек, мамлакат фуқароларига, агар «Ҳизбуллоҳ» ўзини қуроллантирса ёки чегара яқинидаги инфратузилмасини тикласа, Исроил Ливанда жанговар ҳаракатларни давом эттиришига ваъда берди.

АҚШ Ливан армияси билан потенциал қонунбузарликларнинг олдини олиш учун ишлайди, деди Reuters агентлигининг юқори мартабали манбаси. Вашингтон, шунингдек, Ливан қуролли кучларини жиҳозлаш, ўқитиш ва молиявий ёрдам билан таъминлайдиган минтақавий ҳарбий-техник қўмитага қўшилади.

Байден ва Макрон Ливанда сулҳ эълон қилишга тайёрланмоқда

АҚШ ва Франция президентлари Жо Байден ва Эммануэл Макрон Исроил армияси ва «Ҳизбуллоҳ» ташкилоти ўртасида жанглар давом этаётган Ливанда яқин 36 соат ичида оташкесим эълон қилишга тайёрланмоқда. Бу ҳақда Reuters 25 ноябр куни Ливаннинг тўрт нафар юқори мартабали амалдорига таяниб хабар берди.

Журналистларга кўра, 26 ноябр, сешанба куни Исроил вазирлар маҳкамаси «Ҳизбуллоҳ» билан сулҳ битимини тасдиқлаш учун йиғилишни режалаштирган. Ливан парламенти спикери ўринбосари Элиас Бу Сааб Reuters агентлигига берган изоҳида, агар Исроил бош вазири Бинямин Нетаняҳу «фикрини ўзгартирмаса», Байрут АҚШ таклиф қилган ўт очишни тўхтатиш режасини амалга оширишда «жиддий тўсиқлар» кўрмаслигини айтди.