Британия армиясининг собиқ аскари Эрон фойдасига жосуслик қилганликда айбдор деб топилди

Британия армиясининг собиқ аскари Дениэл Халифе Эрон фойдасига жосуслик қилганликда айбдор деб топилди. У махсус бўлинмалар аскарларига оид маълумотларни тўплаб, Теҳронга бериб келган, деб хабар беради BBC.

Қайд этилишича, 23 ёшли йигит 2023 йилнинг сентябрида Лондондаги Уондсворт қамоқхонасидан қочиб кетганини тан олган — у озиқ-овқат етказиб бериш билан шуғулланган юк машинаси остига яшириниб олган.

«Давлат сири тўғрисидаги қонун ҳамда Терроризмга қарши кураш тўғрисидаги қонунларни бузган Халифе ҳукм ўқилганда ҳеч қанақа ҳиссиётини кўрсатмади», — дейилади хабарда.

Прокурорларнинг айтишича, Эрон разведкасидан бўлган шахс 2018 йилда, армия сафига энди келиб қўшилган Халифе билан боғланган. Ўз навбатида аскар «МИ-6» билан алоқа ўрнатиб, икки томонлама агент бўлишни хоҳлаётганини билдирган.

Халифе Facebook орқали Эрон Ислом инқилоби муҳофизлари корпусига алоқадор инсон билан боғланган. У эронликлар билан муносабат ўрнатиб, бир сафар Лондон шимолидаги боғга қолдириб кетилган 2 минг долларни ҳам олган.

Қироллик прокуратура хизмати вакили Бетан Дэвиднинг маълум қилишича, Халифе аскар сифатида «мамлакатнинг миллий хавфсизлигини ҳимоя қилишга мажбур бўлган. «Аммо у шахсий фойдаси учун ўзининг лавозимидан миллий хавфсизликка путур етказишда фойдаланди», — дейди Дэвид.

Халифе армиядаги хизмати давомида 15 нафар аскарга оид маълумотларни тўплаган. Прокурорларга кўра, у ўзи тузган рўйхатни Эронга юборган бўлиши мумкин. Аммо Халифе ҳеч нима жўнатмаганини, Эронга асосан ёлғон маълумотлар юбориб келганини билдирган. 

Суд Халифе ўзгалар қўлига тушган тақдирда жиддий хавф туғдириши мумкин бўлган махфий маълумотларни тўплаганликда айбдор деб топди.