Канадада тоғда адашиб қолган турист 50 кундан кейин топилди

Канада тоғларида адашиб қолган 20 ёшли Сэм Бенастик орадан 50 кун ўтгач қутқарилди, деб хабар беради The Guardian.

Оёғига ухлаш учун мўлжалланган қоп парчаларини ўраб, таёққа суянган ҳолда ҳаракатланиб юрган озғин йигитни нефт компанияси ишчилари пайқаб қолган: улар бир ҳафта давомида маҳаллий ҳудудда тадқиқот ишларини олиб бораётган бўлган. Бу вақтга келиб Бенастикни қидирув ишлари расман якунланган эди.

Турист компания ходимлари томонидан ёрдам кўрсатилгач, отасига қўнғироқ қилган.

Канада қироллик отлиқ полицияси ҳозирда йигит шифохонага жойлаштирилганини тасдиқлаган. Уни совуқ урган, бундан ташқари, вақтинчалик бошпанаси ёниб кетган вақтда тутундан заҳарланган.

Бенастик 7 октябр куни Редферн-Кейли боғидан сафарга чиққан ва у ўз тури 10 кун давом этишини режалаштирган. Бироқ 17 октябр куни Сэм уйига қайтмаган ва йигитнинг қариндошлари уни бедарак йўқолган дея эълон қилган.

Редферн-Кейли провинциал боғи Қояли тоғларнинг шимолий қисмида жойлашган бўлиб, 80 минг гектар майдонни эгаллайди. У ерда Алп ўтлоқлари, ўрмонлар, чўққилар, музликлар, шаршаралар, кўллар мавжуд. Боғ энг яқин автомобил йўлидан 80 километр узоқликда — у ерда об-ҳаво тез-тез ўзгариб туради, охирги уч кунда ҳарорат -20 даражада тушиб кетган ва қор ёғган.