НАТО: РФ аскарлар эвазига КХДР ядро дастурини рағбатлантиряпти

НАТО Россияни Шимолий Кореянинг ядровий дастурини қўллаб-қувватлашда айблади. «Қўшинлар ва қурол-яроғ эвазига Россия КХДРни ракета ва ядровий дастурларида қўллаб-қувватлайди», деди 4 декабр, чоршанба куни НАТО ташқи ишлар вазирларининг Брюсселдаги икки кунлик учрашуви якунида алянс бош котиби Марк Рютте. Шундай қилиб, Москва БМТ санкцияларини бузмоқда, дея таъкидлади Рютте.

Унинг сўзларига кўра, воқеаларнинг бундай ривожланиши Корея яриморолидаги вазиятни беқарорлаштириши ва ҳатто АҚШга таҳдид солиши мумкин. Хусусан, Пхеняндаги режим нафақат НАТОнинг минтақавий ҳамкорлари – Жанубий Корея ва Японияга, балки Европа ва ҳатто АҚШга ҳам ракеталарини қаратиши мумкин, дея огоҳлантирди бош котиб. НАТОнинг 32 давлати ташқи ишлар вазирлари Россия ва Шимолий Корея ўртасидаги ҳарбий ҳамкорликни кескин қоралади, деди Марк Рютте.

РФ КХДРга қурол ва аскар эвазига нефт етказиб берди

Россия 2024 йил мартидан бери Шимолий Кореяга 1 миллион баррелдан ортиқ нефть жўнатди, деб хабар берди 22 ноябр куни BBC рус хизмати Open Source Centre тадқиқот маркази ҳисоб-китобларига таяниб. «Бу доимий нефт оқими Шимолий Кореяга санкциялар жорий қилинганидан бери кузатилмаган барқарорлик даражасини бермоқда», — дейди марказнинг катта таҳлилчиси Жо Берн.

Шимолий Корея ядро қуролини ишлаб чиққани учун халқаро санкциялар остида. Мамлакатга йилига 500 минг баррелдан ортиқ нефт сотиб олиш тақиқланган. Шу билан бирга, 1 миллион баррел ёки 56 минг тонна Россия учун аҳамиятсиз ҳажм бўлиб, расмий маълумотларга кўра, кунига деярли ўн баравар кўп қазиб олинади.

Аввалроқ Британиянинг The Times газетаси Ғарб разведка манбалари Шимолий Корея Россияга йилига 3 миллионга яқин снаряд етказиб беришини, бу Россия армияси Украинага қарши урушда ишлатадиган ўқ-дориларнинг ярмини ташкил этиши ҳақида хабар берган эди.

Reuters: Трамп жамоаси Ким Чен Ин билан музокараларни муҳокама қилмоқда

АҚШнинг сайланган президенти Доналд Трамп жамоаси Шимолий Корея етакчиси Ким Чен Ин билан тўғридан тўғри музокаралар ўтказишни муҳокама қилмоқда, чунки бу қуролли можаро хавфини камайтиришга ёрдам беради. Бу ҳақда 26 ноябр куни Reuters агентлиги Вашингтондаги «мавзудан хабардор» икки манбага таяниб хабар берди.

Агентлик суҳбатдошларига кўра, Трамп жамоасидаги бир неча киши Америка ва Шимолий Корея етакчилари ўртасидаги мавжуд тўғридан тўғри алоқалардан АҚШ ва Шимолий Корея ўртасидаги муносабатларни тиклаш ва мамлакатлар ўртасидаги «музни ёриб юбориш» учун фойдаланилишини кутмоқда. Reuters агентлигининг қайд этишича, Трампнинг КХДР етакчиси билан биринчи президентлик давридаги мулоқоти ўзаро ҳақорат билан якунланган.

Бир неча кун олдин Доналд Трамп Алекс Вонгни миллий хавфсизлик бўйича маслаҳатчи ўринбосари этиб тайинлашни режалаштираётганини эълон қилган эди. АҚШ Давлат департаменти собиқ ходими бир пайтлар Вашингтон учун дипломатик стратегия сифатида Трамп ва Ким ўртасида тўғридан тўғри алоқа ўрнатиш учун лоббичилик қилган ва бу дастлаб муваффақиятли натижаларга олиб келган.

Шу билан бирга, Шимолий Корея Трамп ўрнига президентлик лавозимини эгаллаган Жо Байденнинг муносабатларни яхшилаш бўйича барча чақириқларини эътиборсиз қолдирди.