Японияда «Симанэ» АЭСининг иккинчи реактори қайта ишга туширилди

«Симанэ» атом электр станцияси 2011 йилда юз берган зилзила ва цунами оқибатида авария юз берган «Фукусима-1» АЭС туфайли ёпилган эди.

Фото: The Japan Times

Япониянинг Chugoku Electric Power энергетика компанияси 2012 йилда фаолияти тўхтатилган «Симанэ» АЭСнинг иккинчи энергоблокини қайта ишга туширди, деб хабар беради The Japan Times.

Қайд этилишича, ушбу реактор 2011 йилда авария юз берган «Фукусима-1» АЭС энергоблоки каби сув-сувли типга киради. Ўтган 13 йилдан бери Японияда бу турдаги реакторлардан фақат биттаси қайта ишга туширилган.

«Симанэ» АЭСининг ишга туширилган реактори 820 мегаватт қувватга эга бўлиб, у Японияда ҳозирда фойдаланилаётган 14 та реакторнинг бирига айланди.

Нашрнинг ёзишича, кейинги йилдан бошлаб Японияда табиий газ ва кўмирга бўлган талаб камаяди, чунки Tohoku Electric Power компанияси ҳам яқинда 825 мегаватт қувватли «Онагава» АЭСининг иккинчи энергоблокини қайта ишга туширган.

«Симанэ» АЭСи шу номдаги префектура пойтахти ҳисобланувчи Мацуэ шаҳрида жойлашган. Бу Японияда пректуранинг маъмурий марказида жойлашган ягона атом электр станциясидир. Унинг энергоблоки 2011 йил мартда юз берган зилзила ва цунамидан кейин, 2012 йил январ охирларида тўхтатилган эди.

Эслатиб ўтамиз, 2011 йил март ойида Японияда зилзила содир бўлган ва у 550 квадрат километрдан ортиқ майдонни эгаллаган кучли цунамига сабаб бўлганди. Оқибатда қарийб 16 минг киши ҳалок бўлди. Табиий офат натижасида «Фукусима-1» АЭСда авария содир бўлган: станциянинг 3 та реакторида ядро ёқилғиси эриши кузатилган. Радиоактив чиқиндилар туфайли 80 мингдан ортиқ одамни эвакуация қилишга тўғри келган.