Фарғонада ЙПХ машинаси иштирокида йўл-транспорт ҳодисаси содир бўлди

Фарғона вилояти ИИБ ЙҲХБ Қўқон шаҳрида йўл-патрул хизматига тегишли машина иштирокида юз берган йўл-транспорт ҳодисаси юзасидан маълумот берди.

Қайд этилишича, интернет ижтимоий тармоқларида ЙПХга тегишли автомобил йўл-транспорт ҳодисасига учрагани ҳақида тарқалган видеохабар Фарғона вилояти ИИБ томонидан ўрганиб чиқилган.

Маълум бўлишича, 30 декабр куни Қўқон шаҳар Истиқлол маҳалласидан ўтган Қўқон — Яйпан — Исфара автомобил йўлининг 1-километрида фуқаро Х.Р. ўз бошқарувидаги Onix русумли автомобилда чорраҳага йўл бермасдан кириб келган ва натижада вилоят ИИБ ЙҲХБ ходими Ш.М. бошқарувидаги Tracker русумли автомобил билан тўқнашув содир этган.

Натижада, Onix русумли автомобил йўловчиси ҳамда Tracker автомобили ҳайдовчиси Ш.М. «юмшоқ тўқималарини лат ейиши» ташхиси билан шаҳар шифохонага мурожаат қилган.

Ҳолат юзасидан вилоят ИИБ томонидан ўрганиш ишлари давом этмоқда.

Эслатиб ўтамиз, жорий йилнинг апрел ойида Қашқадарё вилояти ЙҲХБ командири ўринбосари ЙТҲ содир этгани, майда эса Тошкентда BYD ҳайдовчиси ЙПХ инспекторини уриб юборгани тўғрисида хабар берилганди.