Қозоғистон ҳалокатга учраган AZAL самолёти «қора қути»ларини Бразилияга жўнатади

ICAO тавсиялари ҳамда Озарбойжон ва Россия авиация маъмуриятлари билан маслаҳатлашувларни инобатга олган ҳолда, Қозоғистон шундай қарорга келди.

Фото: news.ru / Global Look Press

Қозоғистон Оқтов яқинида ҳалокатга учраган Azerbaijan Airlines самолётининг «қора қути»ларини Бразилиянинг Авиация ҳодисаларини текшириш ва олдини олиш марказига (CENIPA) юборади. Бу ҳақда Қозоғистон транспорт вазирлиги хабар берди.

«Чикаго конвенциясининг 13-иловаси стандартларига мувофиқ, текширув ўтказаётган давлат борт регистраторларининг ўқилишини таъминлайди ва «қора қути»ларни ўқиш ва шифрини очиш учун мамлакатни танлаш тўғрисида қарор қабул қилади», дейилади хабарда.

Қозоғистон ушбу конвенцияни 1992 йилда ратификация қилган ва Халқаро фуқаро авиацияси ташкилоти (ICAO) аъзоси ҳисобланади.

«Юқоридаги ҳужжат асосида, шунингдек, ICAO тавсиялари ҳамда Озарбойжон ва Россия авиация маъмуриятлари билан маслаҳатлашувларни инобатга олган ҳолда, Қозоғистон транспорт вазири Марат Қорабоев бошчилигидаги Авиация ҳодисаларини текшириш комиссияси, парвозни қайд қилувчи қурилмаларни (қора қутиларни) Embraer самолёти ишлаб чиқарилган мамлакат Бразилиянинг Авиация ҳодисаларини текшириш ва олдини олиш марказига (CENIPA) юбориш тўғрисида қарор қабул қилинди», дейилади Қозоғистон транспорт вазирлиги хабарида.

Тайёрлаган Сардор Юсупов

#Россия #Қозоғистон #авиаҳалокат #Озарбойжон

25 декабр тонгида Бокудан Грознийга учган самолёт йўналишини ўзгартириб, Қозоғистоннинг Оқтов шаҳри аэропорти яқинида авариявий қўнишни амалга оширди. Авиаҳалокатда 38 киши ҳалок бўлди.