Туркия Суриядаги курдларга ҳарбий операция билан таҳдид қилди

Анқара курд кучларини қуролли террорчилар билан алоқадорликда айблайди. У курдлар Туркия талабларини қабул қилган тақдирдагина ҳарбий амалиётдан воз кечишга тайёр.

Фото: Anadolu Agency

Туркия Суриядаги курд қўшинлари президент Башар Асад ағдарилганидан сўнг ҳокимиятни «қонсиз» ўзгартириш бўйича Анқаранинг шартларини қабул қилмаса, уларга қарши ҳарбий операция бошлаш билан таҳдид қилди. Туркия ташқи ишлар вазири Хоқон Фидан 7 январ, сешанба куни CNN Turk телеканалига берган интервюсида, агар курд қўшинлари Анқара талабларига рози бўлмаса, эҳтимолий ҳаракатларни изоҳлар экан, «керак бўлган ишни қиламиз», деди.

Бу аниқ нимани англатиши мумкин деган саволга Фидан: «Ҳарбий операция», деб жавоб берди.

Туркия АҚШ томонидан қўллаб-қувватланадиган Сурия демократик кучлари (SDF) етакчилигидаги YPG'ни Туркия давлатига қарши кўп йиллар давомида қуролли кураш олиб борган Курдистон ишчилар партияси (КИП) билан алоқадор террорчи ташкилот деб билади.

Курдларнинг қамоқдаги етакчиси ўз гуруҳини қуролларни ташлашга чақирмоқчи

Туркиянинг Имрали оролидаги қамоқхонада умрбод қамоқ жазосини ўтаётган Курдистон ишчилар партияси (КИП) етакчиси Абдулла Ўжалан КИПни қуролларини ташлашга чақиришга тайёр. Бу ҳақда курдпараст Тенглик ва демократия турк халқ партияси (DEM) икки депутатининг 29 декабр куни берган баёнотига таяниб, Reuters хабар қилди.

Мурожаатда Ўжалан ўз партиядошларига қандай шаклда мурожаат қилиши мумкинлиги аниқлаштирилмаган.

Ўжаланнинг баёнотидан олдин Туркия президенти Ражаб Тоййиб Эрдўғаннинг партиясини қўллаб-қувватловчи Туркиянинг МҲП партияси етакчиси тегишли чақириқ билан чиқди. У курд раҳбарини озод этилиши эвазига Курдистон ишчилар партиясини қуролли қаршиликни тўхтатишга чақиришни таклиф қилди. Эрдўған бу таклифни «тарихий имкониятлар ойнаси» деб атади.

«Ҳайъат Таҳрир аш-Шом» (ҲТШ) гуруҳи етакчиси, Абу Муҳаммад ал-Жулоний номи билан танилган Аҳмад ал-Шара Al Arabiya телеканалига берган интервюсида Суриядаги ўтиш даври ҳукумати Сурия курдлар демократик кучлари (СДК) билан жанг қилиш ниятида эмаслигини айтди: «Сурия шимоли-шарқидаги инқирозни ҳал қилиш учун СДК билан музокаралар олиб борилмоқда». Сиёсатчининг сўзларига кўра, Дамашқдаги янги ҳокимиятнинг мақсади СДКни Сурия қуролли кучлари таркибига қўшишдир.

ХТШ етакчиси курдлар Сурия давлатининг ажралмас қисми эканлиги ҳақидаги фикри билан ўртоқлашди ва мамлакатни бўлиб ташлаш режаларини рад этди. «Суриянинг бўлиниши бўлмайди», деб ишонтирди у. Шу билан бирга, унинг сўзларига кўра, янги ҳокимият Суриянинг КИП учун плацдарм бўлишига йўл қўймайди.