Ўзбекистон АҚШ билан хавфсизлик соҳасидаги ҳамкорликни кенгайтиради

2025 йилга мўлжалланган давлат дастури лойиҳаси муҳокама учун эълон қилинди.

Америка Қўшма Штатлари билан янги даврдаги стратегик шериклик алоқаларини янада чуқурлаштириш чораларини кўриш режалаштирилмоқда.

АҚШ янги маъмурияти вакиллари билан яқин ҳамкорлик алоқалари ўрнатилади, олий даражадаги ташриф ташкил этилади.

АҚШ билан Кенгайтирилган стратегик шериклик мулоқотининг дастлабки раунди Тошкент шаҳрида юқори савияда ўтказилади.

C5+1 формати доирасида ҳамкорлик фаоллаштирилади, жумладан, вазирлар учрашуви, тегишли “ишчи гуруҳлар” йиғилишлари ҳамда ушбу формат ташкил топганлигининг 10 йиллик юбилей саммитини Самарқандда ўтказиш масалалари ишлаб чиқилади.

Парламентлараро ҳамкорлик алоқалари кенгайтирилади, хусусан, Конгресс етакчи аъзоларининг Ўзбекистонга ташрифлари амалга оширилади.

Америка қитъаси мамлакатларидан салоҳиятли инвесторлар Ўзбекистонга жалб қилинади, улар иштирокида турли бизнес-форумлар, кўргазмалар ва бошқа тадбирларни ташкил этиш орқали савдо-инвестициявий ҳамкорлик жадаллаштирилади.

АҚШ билан хавфсизлик ҳамкорлик алоқалари кенгайтирилади.

АҚШ ҳукумати томонидан эълон қилинадиган инсон мезонига оид турли ҳисоботларда Ўзбекистоннинг юқори ўрнини сақлаб қолиш бўйича яқин ҳамкорлик алоқалари давом эттирилади.

АҚШ билан таълим, илм-фан, соғлиқни сақлаш, атроф-муҳит ва бошқа соҳаларда алоқалар кенгайтирилади, хусусан, университетлараро ҳамкорлик, инглиз тилини ўқитиш, фан ва экология соҳаларида қўшма лойиҳалар амалга оширилади.