Украина томонида туриб жанг қилган ва асирга тушган австралиялик ўлдирилган бўлиши мумкин. Австралия Россиядан тушунтириш талаб қилди

Австралия бош вазири Энтони Албаниз агар Россия Украина томонида туриб жанг қилган ва россиялик ҳарбийлар томонидан асирга олинган австралиялик Оскар Женкинсга зарар етказса, ҳукумат «энг қатъий чоралар» кўришини маълум қилди, деб хабар беради Associated Press.

Декабр ойида «военкор» Александр Сладков россиялик ҳарбийлар австралиялик асир билан мулоқот қилгани ва уни бир неча бор ургани тасвирланган видеони эълон қилганди. Эркак ўзини 32 ёшли биология ўқитувчиси Оскар Женкинс деб таништирган. У Австралия ва Украинада яшашини билдирган.

15 январ куни ABC телеканали Женкинс ўлдирилган бўлиши мумкинлигини маълум қилди. Журналистлар бунда УҚК таркибида жанг қилаётган бошқа хорижликларга таянган. Ушбу маълумот расман тасдиқланмаган.

Бош вазирнинг сўзларига кўра, Австралия Женкинснинг ўлими тўғрисида тарқалган хабарларга изоҳ беришни сўраб, Россияга мурожаат қилган. «Биз Россияни зудлик билан Оскар Женкинс мақомини тасдиқлашга чақирамиз. Биз олдингидек жиддий хавотирдамиз», — дейди Албаниз.

Унинг таъкидлашича, агар Женкинсга бирор-бир зарар етказилган бўлса, Австралия ҳукумати «мумкин бўлган энг қатъий чораларни кўради». Айнан қандай чоралар ҳақида гап кетаётганига у ойдинлик киритмаган.

Россия президентининг матбуот котиби Дмитрий Песков Австралия томонининг мурожаатига жавобан «австралияликка оид масала расмий тартибда кўтарилган ёки кўтарилмаганидан» бехабар эканини билдирди. «Эҳтимол, дипломатик каналлар орқали баъзи ҳаракатлар аллақачон амалга оширилгандир, аммо бу бизга қадар етиб келмади. Балки Ташқи ишлар вазирлигимиз билан буни текшириб кўришдан маъно бордир», — дейди у.

Декабр охирида РФ ТИВ расмий вакили Мария Захарова Австралия ҳукумати россиялик ҳарбийлар томонидан қўлга олинган Оскар Женкинс бўйича Россияга мурожаат қилганини айтганди. Унинг сўзларига кўра, қўлга олинган Австралия фуқаросига оид маълумот «текширилмоқда». Захарованинг қўшимча қилишича, агар маълумот тасдиқланса, Австралия расмийлари бунинг учун жавобгар бўлади, чунки улар Украина томонида урушда қатнашаётган «австралиялик ёлланма аскарларга бепарволик билан қарамоқда».