Трамп Кеннеди ўлдирилиши ҳақидаги ҳужжатларни ошкор этишга ваъда берди

АҚШ президенти Доналд Трамп кўплаб махфий ҳужжатларни, хусусан, мамлакатнинг 35-раҳбари Жон Кеннеди ўлдирилиши билан боғлиқ ҳужжатларни ошкор қилишга ваъда берди.

Трамп 20 январ куни пойтахт Вашингтондаги Capital One Arena спортзалида минглаб тарафдорлари билан учрашди.

У собиқ президент Жон Кеннеди ва қортанлилар ҳуқуқлари ҳаракати етакчиси Мартин Лютер Кингнинг ўлдирилиши билан боғлиқ махфий ҳужжатларни лавозимга киришганидан сўнг ошкор қилишини айтди.

«Биз жамоатчиликни қизиқтирган бошқа масалаларга оид ҳужжатларни ҳам эълон қиламиз», деб қўшимча қилди Трамп.

У аввалроқ, жамоатчилик бу масалалар бўйича тўлиқ шаффофликка лойиқ эканини айтган эди.

АҚШ 35-президенти Жон Кеннеди 1963 йил 22 ноябрда Далласда (Техас штати) ўлдирилган. У очиқ лимузинда кетаётиб, милтиқдан ўқ еб, ҳалок бўлди. Расмий тергов қотил Ли Ҳарви Освалд эканини эълон қилди, у ёлғиз ҳаракат қилгани айтилди. Бироқ, бу жиноятда бошқа шахслар ёки гуруҳларнинг иштироки ҳақида кўплаб фитна назариялари мавжуд. Кеннеди ўлими билан боғлиқ тергов ҳужжатлари махфийлаштирилган.

АҚШ қоратанли фуқаролари ҳуқуқлари етакчиси Мартин Лютер Кинг 1968 йил 4 апрелида Теннесси штатининг Мемфис шаҳрида ўлдирилди. У Лотарингия мотелининг балконида отиб ўлдирилди. Жеймс Эрл Рэй қотилликда айбланиб, ўз айбига иқрор бўлди, бироқ кейинчалик ўзининг айбсизлигини эътироф қилди. Мартин Лютер Кинг ўлими билан боғлиқ тергов ҳужжатлари ҳам махфийлаштирилган.