Трамп Украинада тинчлик ўрнатиш учун Путинга босим ўтказиши мумкинлигини истисно этмади

22 январ, чоршанба куни dpa ахборот агентлиги хабарига кўра, АҚШ президенти Доналд Трамп Россия президенти Владимир Путин Украинадаги урушни тўхтатиш бўйича музокаралардан бош тортса, Россияга қарши «катта эҳтимол билан» янги санкциялар жорий этишини айтди.

Оқ уй раҳбари сешанба куни бўлиб ўтган матбуот анжуманида Россия етакчиси ва Украина президенти Володимир Зеленский билан «ўзлари хоҳлаган вақтда» учрашишга тайёрлигини таъкидлади. Трамп, шунингдек, Украинадаги уруш қурбонларининг расмий сонини яна бир бор шубҳа остига олди. Унинг сўзларига кўра, уруш аллақачон «миллионлаб инсонлар»нинг ҳаётига зомин бўлган. Шундай қилиб, Америка президентининг баҳосига кўра, Москванинг йўқотишлари тахминан 800 минг кишини, Киевники эса 600-700 минг кишини ташкил этади.

Трамп, шунингдек, Қўшма Штатлар Украинага ёрдам кўрсатишда НАТОнинг бошқа давлатлари билан солиштирганда номутаносиб даражада юқори молиявий юк кўтараётганини яна танқид қилди ва алянс ҳамкорларини мудофаа харажатларини ЯИМнинг 5 фоизигача оширишга чақирди. «Бу биз ҳақимизда эмас, балки улар ҳақида. Бизнинг орамизда океан бор, шундай эмасми? Бу кичик нарса океан деб аталади», деди у.