Беларус сайлов арафасида интернетга киришни чеклади

Мамлакатда президентлик сайлови якшанба кунига белгиланган. Тахминан ўттиз йил давомида ҳокимиятда бўлган Александр Лукашенко еттинчи муддатга сайланиши кутилмоқда.

Фото: belarus-news.by

Беларусда президентлик сайлови арафасида интернетга кириш чекланди. Hoster хостинг-провайдернинг хабар беришича, 25-27 январ кунлари Беларус сайтларига хориждан кириш мамлакат президенти ҳузуридаги Операцион-таҳлил маркази қарори билан блокланади. Бу ахборот инфратузилмаси учун муайян таҳдидлар билан изоҳланмоқда. Оқибатда Беларусдан ташқаридаги фойдаланувчилар айрим сайтларга кира олмаслиги ва мамлакат ичида эса интернет секинлашиши мумкин.

Ўзгаришлар арзон виртуал хостинг хизматларида жойлаштирилган ресурсларга таъсир қилди. Одатда бу кичик компаниялар ёки ташкилотларнинг веб-сайтлари, лекин баъзида мураккаб сервер ечимларини талаб қилмайдиган йирик веб-сайтлар ҳам бор.

Бундан ташқари, Беларусда Twitch, Steam, Reddit ва Telegram каби хорижий платформаларга, шунингдек, VPN хизматларига киришда муаммолар юзага келди. Википедияга кириш бир ярим соат давомида ўчириб қўйилди, бироқ кейинроқ тикланди.

Мамлакатда президентлик сайлови 26 январ, якшанба кунига белгиланган. Тахминан ўттиз йил давомида ҳокимиятда бўлган Александр Лукашенко еттинчи муддатга сайланиши кутилмоқда. Унинг тўрт нафар рақибидан икки нафари аллақачон унинг ғалабасини тан олган. Норозилик намойишлари билан кечган 2020 йилги сайлов пайтида бутун мамлакат бўйлаб интернет чеклаб қўйилган эди. Кейинроқ Лукашенко бундай қарорларни шахсан ўзи қабул қилганини ва янги оммавий норозилик намойишлари бўлса, бу чораларни такрорлашга тайёрлигини тан олди.