Трамп томонидан музлатилган USAID агентлигининг сайти ишламай қолди

АҚШ президенти маъмурияти Халқаро тараққиёт агентлигини Давлат департаменти назорати остига ўтказмоқчи экани ҳақида тарқалган хабарлар фонида USAID сайти ишламай қолди. Reuters манбасининг айтишича, Трамп агентликнинг мустақил фаолиятига чек қўймоқчи.

Фото: Fernando Vergara/AP

АҚШ Халқаро тараққиёт агентлиги (USAID) сайти Доналд Трамп маъмурияти уни мустақил фаолият юритишдан маҳрум қилиб, Давлат департаменти назорати остига бермоқчи экани ҳақидаги хабарлардан кейин ишламай қолди, деб хабар беради CNN.

Трамп жамоаси агентликни Давлат департаменти ихтиёрига ўтказмоқчилиги ҳақида аввалига Politico нашри ўз манбаларига таяниб хабар берди. Нашрнинг беш нафар суҳбатдоши аниқ режалардан бехабар эканини айтган, аммо «USAID’нинг мустақиллиги аниқ кафолатланмаган». Reuters манбасининг сўзларига кўра, Трамп маъмурияти агентликнинг мустақил фаолиятига чек қўйиш ва уни Давлат департаменти бўйсунувига ўтказиш бўйича чоралар кўради.

Таъкидланишича, агентликни Давлат департаменти назоратига ўтказиш учун АҚШ Конгрессининг рухсати талаб этилиши мумкин, аммо у расман сақланиб қолган тақдирда ҳам кун тартибини ўзи белгилаш имкониятидан маҳрум бўлади.

USAID вакили Трамп маъмурияти агентликни Давлат департаменти ихтиёрига ўтказмоқчи эканини рад этган.

CNN маълумотларига кўра, охирги икки кун давомида USAID ходимлари «гуруҳ чатларида ўз агентликлари тақдирини кузатиш» билан шуғулланган. Улар USAID’нинг Вашингтондаги штаб-квартирасига ташкилот байроғи ва белгиси ҳамон осиғлиқ турган ёки олиб ташланганини кузатган.

Халқаро тараққиёт агентлиги президент Жон Кеннеди томонидан совуқ уруш вақтида — 1961 йилда Конгресс чет эл ёрдамини тақиқлаш тўғрисидаги қонунни қабул қилганидан кейин тузилган. У вақтда агентлик фаолияти фақат СССРга қарши туришдан иборат бўлган. Ҳозир АҚШ — гуманитар ёрдам кўрсатувчи дунёдаги энг йирик донор бўлиб, мамлакат бюджетининг қарийб 1 фоизини шунга сарфлайди.

Доналд Трамп ўзининг инаугурацияси кунида USAID’нинг хориж давлатларга кўрсатаётган ёрдамини 90 кунга музлатиб қўйганди.

USAID’нинг Ўзбекистон билан ҳамкорлиги 1992 йилдан бошланган. 2021 йил ҳолатига кўра, Америка халқи USAID орқали Ўзбекистоннинг ривожланиш дастурларига 500 млн доллардан кўпроқ маблағ ажратган. Айни пайтда USAID Ўзбекистон ҳукумати билан мамлакат иқтисодиётини диверсификация қилиш ва минтақавий савдони ошириш, соғлиқ учун жиддий таҳдидларни бартараф этиш ва ҳукуматнинг аҳоли эҳтиёжларини қондириш салоҳиятини ошириш учун ҳамкорлик қилмоқда.