Курск областига босқиннинг ярим йиллигида Украина қўшини янги юриш бошлади

Украина қуролли кучлари қўмондонлиги бу хабарлар юзасидан муносабат билдирмаган.

«Украина қуролли кучлари Курск областида яна „гўшт штурм“ бошлади. Айни вақтда Махновка, Черкасская Конопелка, Уланок ва Суджага 7 километр масофадаги Фанасеевка қишлоғида жанглар кетмоқда.

Душманнинг қарши ҳужумида кўп сонли техникалар: жанговар зирҳланган машиналар, танклар, траллар ва шахсий таркибнинг юздан ортиқ жангчиси қатнашмоқда», — деб хабар берган «Северний ветер» z-канали.

«Рақиб РФ қуролли кучлари бўлинмаларини Махновка аҳоли яшаш пунктидан сиқиб чиқаришга уринмоқда, Уланок аҳоли яшаш пункти атрофида ҳам жанглар тўхтамаяпти, — деб ёзади россиялик журналист Борис Рожин. — Рақиб техникада (танклар, жанговар зирҳланган машиналар) учта баталён кучлари билан ҳужум қилмоқда, уларга қарши авиация ва артиллериямиз ишламоқда. Вазият оғир».

Истиқболсиз йўналиш

Роппа-роса ярим йил муқаддам украин қўшини Курск областига бостириб кирганди. Ўшанда улар Россиянинг 1000 километр квадратдан ортиқ ҳудудини эгаллаб олганди.

Россия қўшини ўтган вақт ичида бой берилган ҳудудларининг катта қисмини қайтариб олганига қарамай, Курск областининг 500 километр квадрат ҳудуди, жумладан Суджа райони маркази ҳам ҳамон Украина қуролли кучлари назорати остида қолмоқда.

Украин ҳарбийларининг бу сафарги фаоллашуви ушбу шаҳардан жануби-шарқда кузатилмоқда. Фронтнинг мазкур участкаси Украина қуролли кучлари учун истиқболли кўринмайди — бу ҳаракатланиш қийин ва аҳоли кам яшовчи ҳудуд, Курск областининг асосий шаҳарлари эса бошқа йўналишда, Суджадан шимолда жойлашган.

Катта эҳтимол билан, украинларнинг бу амалиётдан мақсади — Россиянинг район марказига энг яқин жойлашган ҳарбий бўлинмаларини шарққа суриб ташлаш ва бу билан Суджа штурми хавфини аритиш ҳисобланади. Украина қуролли кучлари Суджа устидан назоратни бой берадиган бўлса, Курск областининг қолган қисмини ушлаб туришдан маъно қолмайди.

Украинлар қарши ҳужуми муваффақиятли чиқадиган бўлса, Россиянинг Суджага жануби-шарқдан яқинлашиб келаётган, Плехово қишлоғи ҳудудида турган гуруҳи қуршов хавфи остида қолади. Бу гуруҳ шимолдан ва жанубдан - Украина чегараси билан қисиб қўйилади. Бу ҳудудда йўллар йўқ ва чекиниш ҳам қийин бўлади.

Аммо айни вақтда Украина қуролли кучлари амалиёти локал кўринишда. Россияли ҳарбий экспертлар бу чалғитувчи зарба бўлиши мумкинлигини истисно этмаяпти.

«Тор-мор қилишда давом этиш»

Икки томон ҳам жангларнинг ярим йили давомида рақиби улкан йўқотишларга учраётгани ҳақида айтиб келади.

Россия мудофаа вазирлигининг 5 феврал кунги ҳисоботида Курск йўналишидаги жангларда Украина қуролли кучлари 57 минг 655 нафар ҳарбий хизматчи, юзлаб танк, пиёдаларнинг зирҳли машиналари, зирҳли транспортёрлар, артиллерия қурилмалари, минглаб зирҳланган ва оддий автомобилларини йўқотгани айтилган.

«Россия Федерацияси қуролли кучлари Курск области ҳудудида Украина қуролли кучлари тузилмаларини тор-мор этишда давом этмоқда», — дея ҳисобот қилган россиялик ҳарбийлар.

Украина бош штаби маълум қилишича, «Курск операцияси бошланганидан буён душманнинг жами йўқотишлари — 40 минг кишига яқин, шундан 16 мингдан ортиғи — ҳалок бўлганлар», 909 нафар россиялик ҳарбий асир олинган.

«Шунингдек Россия Шимолий Кореядан ёрдам сўрашга мажбур бўлган, улар Курскка ўз ҳарбийларидан 12 минг нафарини юборган. КХДР контингентининг жами йўқотишлари 4 минг киши атрофида», — дея тасдиқлайди Украина бош штаби.

«Олти ойлик қайғу»

2025 йил феврал ҳолатига кўра, Курск операцияси Украина армиясининг устувор йўналишларидан бири бўлиб қолмоқда, дейди Украина қуролли кучлари бошлиғи Олександр Сирский. Унинг вазифалари қаторида у Россия кучларини бошқа йўналишлардан чалғитиш ва Украина қўшинлари ва миллатининг руҳиятини кўтаришни айтади.

Биринчи даъво билан баҳслашиш қийин — Россия чиндан ҳам кўп минг кишилик гуруҳни Курск областига кўчиришга мажбур бўлди ва ҳудуднинг нисбатан кичик, аммо ўз обрўсини сақлаб қолиши учун муҳим қисмидаги жангларда катта йўқотишларга учради.

Аммо фронтнинг бу қисмида Украина ҳам катта қўшин ушлаб туришга мажбур ва улар ҳам йўқотишларга учрамоқда — шу туфайли Украина қуролли кучлари Донбассдаги фронтни барқарорлаштира олмаяпти, у ерда мудофааланаётган украиналик ҳарбийлар эса тез-тез қўшимча кучлар етишмаслигидан шикоят қилмоқда.

Турли лагерлардаги шарҳловчилар Курск областидаги вазият Украина учун борган сари оғирлашаётганини айтмоқда. Ғарбдаги ва украиналик экспертлар Украина қуролли кучларининг сентябрдаги ҳужуми муваффақиятининг ривожланиш истиқболларини кўрмаяпти; Россия томонидагилар ҳам сўнгги пайтларда воқеалар ривожидан тушкунлик ва умидсизлик билдирмоқда.

«Фронтдаги ёлғон ва бу ёлғонни фронт ортида ҳимоя қилиш, шунингдек, генералларнинг масъулиятсизлиги кўп сонли тинч аҳоли ўлимига олиб келганидан буён олти ой ўтди, душман эса иккинчи жаҳон урушидан бери биринчи марта бундай узоқ вақт давомида минглаб аҳоли қолаётган бундай катта ҳудудни эгаллаб олишга муваффақ бўлди, — деб ёзади блогер, Курск области губернаторининг собиқ маслаҳатчиси Роман Алёхин. — Олти ой ғам-ғусса, олти ой сени сотишганини ҳис қилиш, олти ой ўн минглаб ва ҳатто юз минглаб Россия фуқароларининг кераксизлигини ҳис қилиш ва олти ой адолат излаш. Лекин адолат юзасидан айтиш керакки, маълум вақт одамларга ҳамма уларга ёрдам бераётгандек туюлган ва улар ўз ерларига, уйларига қайтмагунларича ташлаб кетилмайдигандек кўринганди».