ОАВ: Эронда Хоманаийдан ядро қуролини тақиқлаш ҳақидаги фатвони бекор қилиш сўралмоқда

Эрон олий раҳбари Али Хоманаий ядро қуролини ишлаб чиқишни тақиқловчи фатвони бекор қилиши керак. Эрон Ислом инқилоби муҳофизлари корпусининг (ИИМК, Эрон Қуролли кучларининг нуфузли бўлинмаси) бир қатор юқори мартабали қўмондонлари фикрича, Теҳрон Ғарбдан келаётган «мавжуд таҳдидларга» қарши туриш учун атом бомбасини ишлаб чиқиши керак. Бу ҳақда Британиянинг The Daily Telegraph газетаси 8 феврал, шанба куни хабар берди.

Унинг сўзларига кўра, қўмондонлар Доналд Трамп АҚШда Оқ уйга қайтганидан кейин ўз фикрларини ўзгартирган. «Биз ҳеч қачон бунчалик ҳимоясиз бўлмаганмиз ва бу кеч бўлмасидан олдин унга (бомба) эгалик қилиш учун сўнгги имкониятимиз бўлиши мумкин», — деди нашр манбаларидан бири.

Хоманаийга қаттиқ сиёсат тарафдорлари томонидан босим кучаймоқда

2005 йилда Атом энергияси халқаро агентлиги (АЭХА) йиғилишида тилга олинган фатвода Хоманаий бундай қуроллар «мутлақо ҳаром», яъни гуноҳ ва Исломда тақиқланганлигини таъкидлаган.

«Биз ҳозир дуч келаётган экзистенциал таҳдид, авваллари олий раҳбарнинг буйруқларини бажарган бир қанча юқори мартабали қўмондонларни ядровий қурол яратишга ундашга мажбур қилди», деди Теҳрондаги Эрон расмийларидан бири.

Сўнгги ойларда Хоманаийга қаттиққўл сиёсат тарафдорлари томонидан босим кучайган, деб ёзади The Daily Telegraph. 2024 йилда ўнлаб Эрон парламентарийлари Миллий хавфсизлик олий кенгашини Ислом Республикасининг ядро сиёсатини қайта кўриб чиқишга чақирганди.