Украинада собиқ президент Порошенкога қарши санкциялар жорий қилинди

Украинанинг собиқ президенти Порошенко ўзининг таъқиб қилинишини «сиёсий сабабга кўра» деб атади ва бу «шахсан Зеленскийнинг» буйруғи билан амалга оширилаётганини таъкидлади.

Фото: Кирилл Чуботин / Keystone Press Agency / Global Look Press

Украинада Миллий хавфсизлик ва мудофаа кенгаши 12 феврал, чоршанба куни бўлиб ўтган йиғилишда халқ депутати, «Европа бирдамлиги» партияси етакчиси ва мамлакатнинг собиқ президенти Петр Порошенкога нисбатан санкциялар жорий қилди. Бу ҳақда Forbes Ukraine интернет нашри ушбу чекловлар мазмунига аниқлик киритмаган ҳолда ёзмоқда.

Сиёсатчининг ўзи Facebookʼда эълон қилган баёнотида унга қарши санкциялар қўллаш қарорини «конституцияга зид» ва «сиёсий сабабларга кўра» деб атади. «Аммо буюртмачи, ижрочи ва имзоловчи битта — шахсан Зеленский», — дея таъкидлади Порошенко.

Украина президенти Володимир Зеленский 12 феврал куни ватандошларига кундалик мурожаатида Миллий хавфсизлик ва мудофаа кенгаши йиғилиши ҳақида гапирар экан, «Украинани, Украина манфаатларини, Украина хавфсизлигини сотиш орқали қўлга киритилган миллиардлаб пуллар блокланиши ва Украина ва украиналикларни ҳимоя қилиш учун ишлаши керак», деди. Бироқ у айнан нима ҳақида гапираётганига аниқлик киритмади.

Петр Порошенкога нисбатан гумонлар

Forbes Ukraine эслатганидек, 2021 йил 21 декабрда Россиянинг Украинага кенг кўламли бостириб кириши арафасида СБУ Петр Порошенко давлатга хиёнатда гумон қилинаётганини эълон қилди. «У гўёки Виктор Медведчукнинг схемасида иштирок этган», деб ёзади нашр. СБУ маълумотларига кўра, Порошенко Жанубий Африкадан кўмир етказиб беришни тўхтатишга ёрдам берган.

Петр Порошенко 2014 йилнинг 7 июнидан 2019 йилнинг 20 майигача Украина президенти бўлган.