Евроиттифоқ: Россия Навалнийнинг адвокатлари ва барча сиёсий маҳбусларни зудлик билан озод этиши керак

Европа Иттифоқи Алексей Навалнийнинг ўлими учун жавобгарликни Россия ҳукумати ҳамда Владимир Путинга юклайди ва барча россиялик сиёсий маҳбуслар озод этилишини талаб қилди. Бу ҳақда ЕИнинг ташқи ишлар ва хавфсизлик сиёсати бўйича олий вакили Кая Каллас томонидан россиялик мухолифат етакчиси ўлимига бир йил тўлиши муносабати билан эълон қилинган баёнотда сўз боради.

«Россия Украинага қарши ноқонуний босқинчилик урушини тобора фаол олиб бормоқда ва шу билан бирга, демократия учун чиқиш қилаётганларни таъқиб қилиб, ички репрессияни давом эттиряпти. Алексей Навалний эркин ва демократик Россия учун ўз жонини фидо қилди. Бугун унинг адвокатлари адолатсиз равишда юзлаб сиёсий маҳбуслар билан қамоқда ўтирибди. Россия Алексей Навалнийнинг адвокатлари ва барча сиёсий маҳбусларни зудлик билан ва сўзсиз озод этиши керак», — дейилади баёнотда.

Навалнийнинг ўлимига бир йил тўлиши муносабати билан қўшма баёнотни, шунингдек, Европанинг 15 та давлати, бундан ташқари, Канада, Австралия ва Янги Зеландия ташқи сиёсий идоралари ҳам эълон қилди.

Дипломатлар Навалнийнинг оиласига ҳамдардлик билдириб, россиялик сиёсий маҳбусларнинг озод этилишини яна талаб қилди.

«Биз Навалнийнинг ўлими учун асосий масъулият Россия ҳукумати зиммасида эканини яна бир бор маълум қиламиз. Орадан бир йил ўтиб, Россияда инсон ҳуқуқлари билан боғлиқ даҳшатли вазият ёмонлашишни давом этмоқда. Кремл бошқача фикрдаги тинч фуқароларни бостирмоқда, қўрқув муҳитини қўллаб-қувватлаяпти ва қонун устуворлигини бузмоқда. Буларнинг барчаси шахсий манфаатлар учун», — дея таъкидланади баёнотда.