АҚШ Давдеп сайти Тайван мустақиллигини тан олмаслик ҳақидаги ёзувни олиб ташлади

АҚШ Давлат департаменти ўзининг расмий сайтидан Тайван мустақиллиги қўллаб-қувватланмаслиги ҳақидаги баёнотни олиб ташлади. Бу ҳақда Американинг CNBC телеканали хабар берди.

Давлат департаменти веб-сайтидаги баёнотнинг янгиланган версиясида Тайван АҚШ Мудофаа вазирлиги билан технология ва яримўтказгичлар соҳасида ҳамкорлик қилиши ва Америка маъмурияти оролнинг халқаро ташкилотлардаги иштирокини қўллаб-қувватлаши таъкидланган.

АҚШ Давлат департаменти вакилининг айтишича, ўзгаришлар ғайриоддий эмас ва Вашингтоннинг Тайван билан норасмий муносабатларини акс эттириш учун ахборот кун тартибини янгилаш билан боғлиқ.

«Биз статус-квони ўзгартиришга қаратилган ҳар қандай бир томонлама уринишларга қаршимиз. Биз томонлар ўртасидаги мулоқотни қўллаб-қувватлаймиз ва келишмовчиликлар тинч йўл билан ҳал этилишига умид қиламиз», дейилади баёнотда.

Шу билан бирга, баёнотда таъкидланишича, АҚШ маъмурияти «ягона Хитой» тамойилига амал қилишда давом этади. «АҚШ Тайван бўғозида тинчлик ва барқарорликни сақлаш тарафдори», дейилади ҳужжатда.

Айни пайтда Хитой Ташқи ишлар вазирлиги ўзгаришларга ҳали изоҳ бермади.

Иккинчи жаҳон урушидан кейин Хитойда Чан Кай-ши бошчилигидаги Гоминдан кучлари ва Мао Цзедун бошчилигидаги Хитой Коммунистик партияси (ХКП) ўртасидаги фуқаролар уруши якунланди.

Коммунистларнинг ғалабаси натижасида 1949 йил 1 октябрда Хитой Халқ Республикаси эълон қилинди. Мағлуб бўлган гоминдан тарафдорлари Тайванга қочиб кетди ва у ерда муваққат ҳукумат тузди.

Пекин Тайванни ўз ҳудудининг ажралмас қисми деб ҳисобласа-да, орол 1949 йилдан бери амалда мустақиллигини сақлаб келмоқда.

Сўнгги йилларда Хитой Тайванга ҳарбий босимни кучайтирмоқда ва оролни материк билан бирлаштириш учун куч ишлатишни истисно этмаяпти.