«Сиз келишув тузишингиз мумкин эди»: Трамп Россия билан музокаралардан кейин Украинани айблади

АҚШ президенти Доналд Трамп Россия ва Украина делегацияларининг Ар-Риёддаги музокараларидан сўнг Украинани танқид қилди ва маслаҳатлашувларга жалб қилинмаган Киевнинг реакциясидан ҳафсаласи пир бўлганини айтди. У уруш бошланишида Зеленскийни айблаган.

«Мен улар [музокаралар столида] жой йўқлигидан хафа бўлишганини эшитдим. Лекин уч йилдан бери ўша ердасиз-ку. Сизлар [можарони] бошламаслигингиз керак эди. Буни жуда осонлик билан ҳал қилиш мумкин эди», — деди у ўзининг Флоридадаги қароргоҳида BBC мухбири саволига жавоб берар экан.

«Сиз келишиб олганингизда бўларди», — дея қўшимча қилган Трамп.

Володимир Зеленский бир кун аввал Ар-Риёддаги Россия-АҚШ учрашуви Киев учун сюрприз бўлганини айтганди. У урушни тўхтатиш тўғрисидаги қарорни Украинасиз қабул қилиб бўлмаслигини яна бир бор такрорлади.

Bloomberg агентлиги манбага асосланиб хабар беришича, Саудия Арабистони валиаҳд шаҳзодаси Муҳаммад ибн Салмон музокараларда Зеленский ҳам бўлишини истаган, аммо Вашингтон ва Москва учрашув Украина вакиллари иштирокисиз бўлишини талаб қилишган.

Шунингдек, Трамп журналистларга Володимир Зеленскийнинг рейтинги гўёки «4 фоизга тушиб кетгани», мамлакатга сайловлар кераклигини айтди ва шу билан Россия президенти Владимир Путиннинг асосий тезисларидан бирини такрорлади.

Америка президентининг сўзларига кўра, Саудия Арабистонидаги музокаралардан кейин тинчлик келишувига эришилишига «ишончи ортган».

«Улар [музокаралар] жуда яхши бўлди. Россия нимадир қилишни истамоқда. Улар ёввойи ваҳшийликни тўхтатмоқчи. Ўйлайманки, менда бу урушга чек қўйиш учун куч бор ва мен яна ўйлайманки, ҳаммаси жуда яхши кетмоқда», — деган Трамп.

Шунингдек, у урушни тўхтатиш бўйича келишув тузилган тақдирда Европа тинчликпарвар кучларини Украинага юбориш ғоясини қўллаб-қувватлашини билдирган.

«Агар улар шундай қилмоқчи бўлса, бу ажойиб, мен бунга бутунлай розиман», — деган у.

Трамп Владимир Путин билан феврал ойи охиригача ҳам учрашиши мумкинлигини истисно этмаган.

У Мар-а-Лагодаги қароргоҳини тарк этаётганда, журналистлардан бири ундан ой охиригача учрашув бўладими, деб сўради.

«Катта эҳтимол билан», — дея жавоб қилган Трамп.

Аввалроқ, Россия президенти ёрдамчиси Юрий Ушаков Ар-Риёдда Америка ва Россия делегациялари ўртасидаги музокаралар якунлари бўйича Путин ва Трамп учрашувининг аниқ санасини айтиш қийинлигини айтган эди.

Ар-Риёддаги музокаралар кенг кўламли босқин бошланганидан кейин Россия ва АҚШ ўртасидаги биринчи олий даражадаги учрашув бўлди.

Шундан сўнг Россия ТИВ раҳбари Сергей Лавров Москва ҳеч қандай тинчлик шартномасида ҳам НАТО давлатлари тинчликпарвар кучларининг Украинада жойлаштирилишига рози бўлмаслигини айтди.

«Ҳар қандай бошқа байроқ остидаги қуролли кучларнинг пайдо бўлиши ҳеч нарсани ўзгартирмайди. Бу, албатта, мутлақо қабул қилиб бўлмайдиган ҳолат», — деди у.

Унинг сўзларига кўра, АҚШ ва Россия Москва ва Вашингтонда ўз элчиларини тайинлаш ва «ҳамкорликни тўлиқ ҳажмда тиклаш» учун шароит ҳозирлаш ниятида.

«Бу жуда фойдали суҳбат бўлди. Биз нафақат тингладик, балки бир-биримизни эшитдик», — деди у.

У НАТОнинг ҳар қандай кенгайиши ва унга Украинанинг қўшилиши Россия учун тўғридан тўғри таҳдид бўлиши ҳақида илгари айтилган гапларни такрорлади.

АҚШ давлат котиби Марко Рубио Россия урушни тўхтатишда иштирок этишга тайёрлигига амин эканини айтган.

«Бугун узоқ ва машаққатли, аммо муҳим йўлнинг биринчи қадами», — дея қўшимча қилди у.