Зеленский АҚШ билан келишувни имзолашга тайёр

Украина президенти Володимир Зеленский Киев ва Вашингтон ўртасидаги тоғ-кон бўйича келишувни «имзолашга тайёрлиги» ва АҚШ билан «конструктив мулоқот» ўтказилишини исташини айтди. Украина раҳбари 3 март, душанба куни ўз веб-сайтида унинг шарҳидан парчаларни чоп этган Британиянинг BBC медиа компаниясининг тегишли саволига жавоб берди.

«Мен шунчаки Украина позицияси эшитилишини хоҳлайман», деди Украина давлати раҳбари.

«Биз шерикларимиз бу урушда тажовузкор ким эканлигини эслаб қолишларини истаймиз», — дея қўшимча қилди у.

2 март куни Лондонда бўлиб ўтган Европа етакчилари саммитидан сўнг чиқиш қилган Зеленский Вашингтондаги сўнгги учрашув ҳамкор сифатида на АҚШга, на Украинага фойда келтирмаганини, фақат Россия президенти Владимир Путин учун фойдали эканини айтди.

Шу билан бирга, Украина раҳбари таклиф қилинса, Оқ уйга қайтишини маълум қилди.

Зеленский Британия пойтахтида бўлиб ўтган музокаралардан сўнг журналистлар билан суҳбатлашди. Музокараларда Европа етакчилари Украина билан урушни тўхтатиш ва Киевни бўлажак Россия тажовузидан ҳимоя қилиш учун тўрт банддан иборат ўзаро ҳамкорлик режасини келишиб олди.

АҚШ молия вазири: Келишув ҳозир музокаралар столида эмас

Айни пайтда АҚШ молия вазири Скотт Бессент CBS News телеканалига берган интервюсида нодир металлар бўйича келишув ҳозирча муҳокама қилинмаганини айтди. «Президент Зеленский давом этмоқчими ёки йўқми, шуни кўришимиз керак, деб ўйлайман. Агар у жанглар давом этишини истаса, бекор бўладиган иқтисодий келишувдан нима маъно бор. Президент Трамп тинчлик келишувини хоҳлайди», — деди Бессент.

Унинг сўзларига кўра, «президент Зеленский келиши ва ушбу иқтисодий битимни имзолаши керак эди» ва у «буни бузишга қарор қилди».