Зеленский: Киев ҳудудларнинг Россия томонидан аннексия қилинишини тан олмайди

Украина Россия томонидан босиб олинган ҳудудларни ҳар доим вақтинча босиб олинган ҳудудлар деб ҳисоблайди, гарчи мамлакатда ҳозирда Россия Федерациясини бутунлай сиқиб чиқариш учун ҳарбий кучлар етишмаса ҳам, деди Володимир Зеленский.

Фото: Carlos Jasso/REUTERS

Украина ҳозирда Россия томонидан босиб олинган ўз ҳудудлари аннексиясини «ҳеч қачон» тан олмайди, ҳатто бу тинчлик келишувига эришиш учун зарур бўлса ҳам. Бу ҳақда 2 март, якшанба оқшомида Украина президенти Володимир Зеленский Европа етакчиларининг Лондондаги саммитидан сўнг британиялик журналистлар билан суҳбатда айтиб ўтди.

Украина раҳбарининг таъкидлашича, Киев Россия томонидан босиб олинган ҳудудларни ҳар доим «вақтинчалик босқинчилик» деб ҳисоблайди, гарчи мамлакат ҳозирда Россияни бутунлай сиқиб чиқариш учун етарли ҳарбий кучга эга бўлмаса ҳам. «Ҳудудларимиз ва қадриятларимиз сотилмайди. Эркинлигимиз сотилмайди. Россия бизни бу ишга тортганлиги учун биз катта нарх тўлаяпмиз», — деди Зеленский.

Украина ишончли хавфсизлик кафолатлари билан таъминланган тақдирдагина ўт очишни тўхтатишга рози бўлади, дея қўшимча қилди Зеленский. У бундай кафолатлар Украинадаги янги ҳарбий ҳаракатларни Россия учун имконсиз қилишига ёки Москва бунга борса, Украина ва унинг иттифоқчиларининг «қаттиқ жавобига» олиб келишига умид билдирди.

Париж ва Лондон Украинада бир ойлик сулҳни таклиф қилди

Франция ва Британия Россия ва Украина ўртасида бир ойлик қисман сулҳ тузишни таклиф қилмоқда. Франция давлати раҳбари Эммануэл Макрон 2 март куни Le Figaro газетасига интервю берди.

Maкрoннинг айтишича, ўт очишни тўхтатиш ҳаво ва денгиз зарбалари ҳамда энергетика инфратузилмасига ҳужумларни тўхтатишга қадар чўзилиши мумкин.

«Ўт очишни тўхтатиш бўлса, (у) фронтда амалда экани ёки йўқлигини текшириш жуда қийин бўлади», деб таъкидлади Эммануэл Maкрoн ва фронт чизиғининг узунлиги Париждан Будапештгача бўлган масофага тенг эканлигини қўшимча қилди.