Трамп талабаларнинг норозилик намойишига йўл қўядиган университетлар молиялаштиришдан узилишини маълум қилди

АҚШ президентига кўра, намойиш ташвиқотчилари қамоққа олинади ёки ўзлари келган мамлакатга бутунлай депортация қилинади.

Фото: The Washington Post

АҚШ президенти Доналд Трамп талабалар намойишларига йўл қўйиб берадиган Америка мактаб ва университетлари федерал молиялаштиришдан тўхтатилишини ваъда қилди.

«Ноқонуний намойишларга рухсат берадиган ҳар қандай коллежлар, мактаб ёки университетлар барча федерал молиялаштиришдан тўхтатилади. Ташвиқотчилар қамоққа ташланади ёки ўзлари келган мамлакатига бутунлай қайтариб юборилади. Америкалик талабалар ўқишдан бутунлайга четлатилади ёки жиноятидан келиб чиқиб, ҳибсга олинади», — деб ёзади Трамп ижтимоий тармоқлардаги саҳифасига.

Колумбия университети аллақачон норозилик намойишлари туфайли молиялаштиришдан узилиш таҳдидига дуч келган. Трамп маъмурияти таълим муассасаси Фаластин тарафдори бўлган талабалар норозиликлари пайтида антисемитизмни бартараф эта олмагани сабабли университетнинг федерал грантлари ва шартномаларини кўриб чиқиш бошланганини маълум қилди.

Январ охирларида Трамп антисемитизмга қарши кураш тўғрисидаги фармонни имзолаган ва Фаластинни ёқлаб ўтказилган намойишларда иштирок этган чет эл талабаларини депортация қилишга ваъда берганди. Фармон билан федерал вазирлик ва идораларга 60 кун ичида антисемитизмга қарши курашда фойдаланиш мумкин бўлган воситаларни ишлаб чиқиш юкланган.

Исроилнинг Ғазо секторидаги ҳарбий операциясига қарши намойишлар 2023 йил 7 октябрдан кейин бошланганди. 2024 йил баҳорда намойишчилар Колумбия университети кампусининг асосий биноларидан бирини эгаллаган. Намойишлар, шунингдек, Калифорния университети, Техас университети, Шимолий Каролина университетларида ҳам бўлиб ўтган. Намойишчилар АҚШ ҳукуматига Исроилни ҳар қандай молиялаштиришдан воз кечишни ва Ғазо секторидаги жанговар ҳаракатларни қўллаб-қувватлашни тўхтатишни талаб қилган.