Трамп Канада товарларига божлар жорий этилганидан кейин Трюдо билан қўнғироқлашди

АҚШ президенти Доналд Трамп ва Канада бош вазири Жастин Трюдо импорт божлари жорий этилганининг эртаси куни телефон орқали 50 дақиқа мулоқот қилди. Бош вазир офиси суҳбатни «конструктив» деб атади. CNN’га кўра томонлар «савдо муросаси» тафсилотларини келишиб олган.

Америка президентининг маълум қилишича, музокаралар «қайсидир даражада дўстона» ўтган. «Мен унга кўплаб одамлар Канада ва Мексика чегаралари орқали ўтаётган фентанилдан ўлганини ва ҳеч нарса мени бу тўхтатилганига ишонтира олмаганини айтдим. У вазият яхшиланганини билдирди, аммо мен шундай дедим: «Бу етарли эмас», — деб ёзади Доналд Трамп Truth Social ижтимоий тармоғига.

4 март куни АҚШнинг Канада товарлари импортига 25 фоизли божлари кучга кирди. Бунга жавобан Оттава Америка товарларига ҳам шу каби божларни жорий этди. Шундан сўнг Доналд Трамп Канада маҳсулотлари учун божларни икки баробарга оширишни ваъда қилди, Жастин Трюдо эса Америка президентини савдо урушини бошлашда айблади.

Кейинроқ АҚШ савдо вазири Говард Латник божла масаласида Канада билан келишувга эришиш мумкинлигини маълум қилди. Хусусан, ушбу чоралар юмшатилиши мумкин (масалан, автомобил саноати маҳсулотларига нисбатан). CNN маълумотларига кўра, Канада чегара хавфсизлигини кучайтириши керак бўлади. 

Шунингдек, Мексика товарларига нисбатан ҳам 25 фоизли, Хитойдан импорт қилинадиган маҳсулотларга эса 10 фоизли бож жорий этилган. Трамп ўзининг мазкур қарорини «Мексика, Канада ва Хитойни ноқонуний иммиграция ҳамда заҳарли фентанил ва бошқа гиёҳванд моддаларнинг АҚШга кириб келишини тўхтатиш борасидаги ваъдасини бажаришга мажбурлаш» дея изоҳлаган.

Америка божлари кучга кирганидан кейин Хитой ҳам бунга жавоб чоралари қўлланишини эълон қилди. Мексика президенти Клудия Шейнбаум АҚШга жавоб қайтаришга ваъда бериб, кўриладиган чоралар бўйича 9 март куни батафсил чиқиш қилишини айтди.