Истеъфодаги полиция ити ўрмонда йўқолган қариянинг ҳаётини сақлаб қолди

Англияда Айиқ лақабли 12 яшар немис овчаркаси кекса эркакнинг ҳаётини сақлаб қолишга ёрдам берди. Итнинг эгаси Жулия Поуп воқеа ҳақида The Guardian нашрига айтиб берди.

Айиқ — 48 килоли истеъфодаги полиция ити. У кучукча пайтидаёқ хизматга кирган ва умрининг кўп қисмини полицияда ўтказиб, жиноятчилар ва бедарак йўқолган одамларни қидириш билан шуғулланган.

2020 йилда Айиқ нафақага чиқди. Ўшандан бери у Жулиа Поупнинг уйида яшайди — аёл ҳам турмуш ўртоғи билан бирга илгари полицияда хизмат қилган. 2023 йил августда итда умуртқа чурраси аниқланган. Ўшанда Айиққа жарроҳлик амалиёти керак бўлди, аммо у тез орада соғайиб кетди. Бир неча ойдан кейин Айиқда хавфсиз ўсма ҳам топилди. Ит яна бир операцияни бошдан кечирди ва унинг соғлиғини тиклашга узоқ вақт кетди: 2024 йил ноябргача ит уйдан деярли чиқмади.

12-туғилган куни муносабати билан итнинг эгалари унга кичкина совға тайёрлашга қарор қилди. Жулия билан бирга Айиқ ўрмонга қисқа сайрга йўл олди. Дастлаб ҳаммаси одатдагидек кечди: ит тоза ҳаводан тўйиб нафас оларди. Бироқ бир пайт у кутилмаганда тўхтаб, эгасини ўрмон ичига тортиб кета бошлади.

Жулия ерда чўзилиб ётган кекса одамга дуч келди. У адашиб қолганини, йиқилиб тушиб, ўрнидан тура олмаётганини айтди. Эркакни топиб олишганида, у аллақачон музлай бошлаган, танасида бир нечта тирналган жойлар бор эди.

Итнинг эгаси полицияга қўнғироқ қилди — маълум бўлишича, эркак бир неча соатдан бери бедарак кетган, унинг оиласи аллақачон хавотирга тушган эди. Полициячиларнинг қидируви ҳам натижасиз тугаган. Жулиянинг таъкидлашича, агар Айиқ эркакни топмаганда, тунда унинг омон қолиши даргумон эди.

Айиқ билан бирга Жулия эркакни энг яқин автотураргоҳга олиб борди, у ерда уни полициячилар ва қариндошларидан бири кутиб олди.

“Машинага ўтиришдан олдин эркак яна бир бор бизга миннатдорлик билдириш учун ортига ўгирилди. Айиқ эса пинагини ҳам бузмади. У ўз вазифасини адо этганидан кейин қорнини қашлатиш учун ётиб олди”, — деб эслайди Жулия.

Унинг сўзларига кўра, ўша оқшом Айиқ байрам стейки билан меҳмон қилинган.