Полшада Ўзбекистон фуқароларининг ички аъзоларини сотиш билан шуғулланган шахс қўлга олинди

Полшалик чегарачилар инсон органлари савдоси билан шуғулланган жиноий гуруҳнинг 35 ёшли украиналик аъзосини қўлга олди.

Қайд этилишича, Қозоғистонда ушбу аёл сиртдан 12 йил муддатга қамоқ жазосига ҳукм қилинган. Айблов версиясига кўра, у «қора бозор»да 56 дона инсон буйрагининг сотилишини ташкиллаштирган.

Полшанинг Пшемисл шаҳри прокуратураси матбуот хизматининг маълум қилишича, аёл 6 март куни Интерпол сўровига кўра Полша ва Украина ўртасидаги темирйўл кесишмасида ушланган. Қўлга олинган аёл 2020 йил ноябрдан бери қидирувда бўлган.

Қозоғистон махсус хизматлари версиясига кўра, аёл 2017 йилдан 2019 йилга қадар жиноий фаолият билан шуғулланган. Қозоғистон, Арманистон, Озарбойжон, Украина, Қирғизистон, Тожикистон, Ўзбекистон, шунингдек, Таиланд фуқаролари унинг қурбони бўлган.

Прокуратура сўроқ қилиб бўлганидан кейин округ судига аёлни экстрадиция қилиш учун етти суткага ҳибсга олиш бўйича илтимоснома киритган.

Эслатиб ўтамиз, 2023 йилда Покистонда бадавлат мижозларга трансплантация қилиш учун одамларнинг буйрагини ноқонуний равишда кесиб олган шифокор бошчилигидаги саккиз кишидан иборат жиноий гуруҳ ҳибсга олинган эди.