12 март янгиликлари: Ўзбекистонда рўй берган муҳим воқеа ва ҳодисалар

Танқислашиб қолган «памперс»лар, «иномаркалар»дан воз кечаётган раҳбарлар, Мирзиёевнинг Францияга ташрифи ва безориликда айбланиб қамоққа олинган Валломов — ўтган кун давомида Kun.uz’да ёритилган долзарб ва муҳим Ўзбекистон янгиликлари билан таништирамиз.

Ўзбекистонда «памперс» танқислиги кузатила бошланди

Ўзбекистонда гигиеник таглик ва прокладкалар импорти кескин пасайди. 2025 йилнинг январ-феврал ойларида бу маҳсулотлар импорти 2112 тоннани ташкил этди, бу эса 2024 йилнинг шу даврига нисбатан 1,8 баробарга кам. Қиймат жиҳатдан эса импорт 2,7 баробарга қисқариб, 5,6 млн долларга тушган.

Kun.uz бу ҳолатга эътибор қаратишига ижтимоий тармоқларда болалар таглиги учун сертификат жорий этилгани ва импорт тагликларга сертификат берилмаётгани ҳақида тарқалган миш-миш сабаб бўлди. Мажбурий давлат рўйхатидан ўтказилиши лозим бўлган ва хавф даражаси юқори бўлган маҳсулотлар сирасига болалар сўрғичи, турли кийимлар, тагликлар, қулоқ тозалайдиган пахтали чўплар ва ҳоказо маҳсулотлар ҳам киритилгани маълум бўлди.

Таъкидлаш жоизки, 2023 йилда Ўзбекистонга аёллар ва болалар гигиеник воситалари импорти 102,8 млн долларга етган бўлса, 2024 йилда бу кўрсаткич 86,9 млн долларга тушган.

Шавкат Мирзиёев давлат ташрифи билан Францияда

Шавкат Мирзиёев Франция президенти Эммануэл Макроннинг таклифига биноан Парижга давлат ташрифи билан борди. Президентни Францияда истиқомат қилаётган ва таҳсил олаётган ватандошлар илиқ кутиб олиб, у билан самимий суҳбатлашди.

Ташриф доирасида Елисей саройида олий даражадаги музокаралар бўлиб ўтди. Бу ҳақда алоҳида батафсил тўхталиб ўтамиз.

Шунингдек, Мирзиёев БМТнинг Таълим, фан ва маданият масалалари бўйича ташкилоти (ЮНЕСКО) бош директори Одри Азуле билан учрашиб, ҳамкорликни янада ривожлантириш ва Самарқандда ўтадиган ЮНЕСКО Бош конференциясининг 43-сессиясига тайёргарлик масалаларини муҳокама қилди.

ЮНЕСКОнинг ушбу сессияси ташкилотнинг тарихида Париждан ташқарида ўтадиган илк тадбири бўлиб, бу ташкилотнинг 80 йиллик юбилейига тўғри келади. Одри Азуле Ўзбекистон билан ҳамкорликни юқори баҳолаб, тадбирга кенг кўламли тайёргарлик учун миннатдорлик билдирди.

Амалдорлар маҳаллий хизмат машиналарига ўтмоқда

Ўзбекистонда давлат амалдорлари хизмат автомобилларини маҳаллий моделларга алмаштирмоқда. Президент топшириғига амал қилган ҳолда бош вазир Абдулла Арипов Mercedes-Benz ўрнига Chevrolet Malibu’дан фойдалана бошлади.

Ҳукумат раҳбари барча амалдорларга хорижда ишлаб чиқарилган хизмат машиналаридан фойдаланишни тўхтатиш буйруғини берган. Барча вазирлик ва идоралар, Қорақалпоғистон Республикаси, вилоятлар ва Тошкент шаҳар ҳокимликлари маҳаллий автомобилларга ўтган. Илгари амалдорлар фойдаланган чет эл машиналари E-auksion платформасида сотилади.

Вилоят ҳокимлари учун эса Tahoe ва Traverse хизмат машиналари ажратилган. Ҳукумат бу ўзгаришни миллий ишлаб чиқарувчиларни қўллаб-қувватлаш ва давлат харажатларини қисқартириш мақсадида амалга ошираётганини билдирмоқда.

Фарғонада безорилик қилган Валломов қамоққа олинди

Фарғонада жамоат тартибини бузган ва клуб ходимларини калтаклаган Отабек Валломов қамоққа олинди. ИИБ маълумотига кўра, у беш нафар шериги билан «Верона» клубида жанжал чиқариб, ходимларга тан жароҳати етказган.

Тергов хулосасига кўра, Валломов ва шериклари жамоат тартибини қасддан бузиб, икки нафар ходимга зўравонлик қўллаган. Уларнинг ҳаракатлари Жиноят кодексининг 104-моддаси (қасддан оғир шикаст етказиш) ва 277-моддаси (безорилик) билан баҳоланмоқда.

Ҳозирда Валломов қамоққа олинган, шериклари бўйича тергов давом этмоқда. ИИБ жабрланган фуқароларга мурожаат учун алоқа рақамларини эълон қилди.

Маълумотларга кўра, жанжал давомида Валломов ўзини таништириб, клубни сотиб олишини айтган. Ҳукумат органлари бу каби безорилик ҳаракатларига қарши қатъий чора кўришини таъкидлади.

Ўзбекистон аҳолиси бир аср аввалгидан 8,5 баробар кўпроқ

Ўзбекистон аҳолиси бир аср олдингига нисбатан кескин кўпайган. Миллий статистика қўмитаси маълумотларига кўра, 1920 йилда мамлакатда 4,4 млн киши истиқомат қилган бўлса, 2025 йил 1 январ ҳолатига кўра бу рақам 37,5 млн кишига етди.

Ўн йилликлар кесимига эътибор қилинадиган бўлса, 1930 йилда 4,9 млн, 1940 йилда 6,6 млн, 1950 йилда 6,2 млн, 1960 йилда 8,4 млн, 1970 йилда 11,8 млн, 1980 йилда 15,8 млн, 1990 йилда 20,2 млн, 2000 йилда 24,5 млн, 2020 йилда эса 33,9 млн киши қайд этилган. Рақамлардан фақат Иккинчи жаҳон уруши даврида мамлакат аҳолиси сони камайганига гувоҳ бўлиш мумкин.

Мустақиллик йилларида мамлакат аҳолиси қарийб икки баробар кўпайган, биргина XXI асрнинг ўзида мамлакат аҳолиси 13 млн кишига ошган. Демографик ўсиш туғилиш даражасининг юқорилиги, ҳаёт даражасининг яхшиланиши ва иқтисодий ривожланиш билан боғлиқ экани таъкидланмоқда.