Покистонда жангарилар йўловчи поездини ўққа тутди ва одамларни гаровга олди

Jaffar Express компаниясининг Кветта шаҳридан Равалпиндига йўл олган поездига ҳужум мамлакат жануби-ғарбида, Белужистон вилоятида содир бўлди.

Жангариларнинг ҳаракатлари натижасида поезд ҳаракати тўхтатилган. Таркиб туннелда турибди, деб хабар берган Reuters. AFP агентлиги полиция вакилига таяниб ёзишича, поезд тоғдаги туннел олдида тўхтатилган.

Полиция маълумотларига кўра, туннел яқинида портлаш, шунингдек, отишма овози эшитилган. Поезд тўхтатилган ҳудудда мобил алоқа ва интернет йўқ, дея маълум қилди BBC’га маҳаллий расмийлар.

«Белужистон озодлик армияси» баёнотида айтилишича, жангарилар поездда кетаётган одамларни, шунингдек, ҳужумни қайтаришга уринган хавфсизлик кучларини гаровга олган. Айирмачилар ўз баёнотида агар полиция ва ҳарбийлар чекинмаса, гаровга олинганларни йўқ қилиш билан таҳдид қилмоқда.

Расмийлар гаровга олинганлар ҳақидаги маълумотни ҳали тасдиқламади. Поезд ўққа тутилиши оқибатида машинист яраланган.

Покистон полицияси маълум қилишича, поезд тўхтатилган жойга хавфсизлик кучлари юборилган. Белужистон вилояти ҳукумати вакили маҳаллий Dawn нашрига берган интервюсида хавфсизлик кучларининг жангарилар билан шиддатли отишмалари ҳақида айтиб берган.

Покистон ички ишлар вазири Муҳсин Накви поездга қилинган ҳужумни қоралади ва расмийлар «айбсиз йўловчиларга ўқ узган ҳайвонларга ён бермаслиги»ни айтди.

«Белужистон озодлик армияси» 1970-йиллар бошларида ташкил этилган исёнчи ташкилот бўлиб, у Белужистон мустақиллигини тан олишни талаб қилади ва минтақа ресурсларини тўлиқ назорат қилишга даъво қилади. У АҚШ, Буюк Британия ва Европа Иттифоқи давлатлари каби бир қатор мамлакатларда террорчи ташкилот деб топилган.

Ўтган йили ташкилот жангарилари ҳудудда қатор ҳалокатли портлашларни амалга оширганди.

2024 йил ноябрида Кветта темирйўл станциясида поезд портлаши оқибатида ўнлаб одамлар ҳалок бўлган, яна ўнлаб кишилар жароҳатланганди.