Путин: Россия Украинада ўт очишни тўхтатишга баъзи шартларда тайёр

Россия президенти Владимир Путин АҚШ президенти Доналд Трампга Россия-Украина можаросини тартибга солишга қаратилган эътибори учун миннатдорчилик билдирди. Шунингдек, Хитой раҳбари Си Жинпинг, Ҳиндистон бош вазири Нарендра Моди ва бошқа раҳбарларнинг ушбу муаммони ҳал этишга қўшган ҳиссасини қайд этди.

«Украинанинг ўт очишни тўхтатишга тайёрлигига келсак, мен буни қандай баҳолашимни, албатта, айтаман. Лекин гапимни АҚШ президенти жаноб Трампга Украинадаги вазиятни тартибга солишга катта эътибор қаратгани учун миннатдорлик изҳор қилишдан бошламоқчиман», деди Владимир Путин Беларус президенти Александр Лукашенко билан музокаралар якунлари бўйича ўтказилган матбуот анжуманида.

«Ҳаммамизнинг ўз долзарб ишларимиз бор, лекин кўплаб давлатлар раҳбарлари – Хитой Халқ Республикаси раиси, Ҳиндистон бош вазири, Бразилия ва Жанубий Африка президентлари бу масала билан шуғулланмоқда ва бунга кўп вақт ажратмоқда. Бунинг учун уларнинг барчасидан миннатдормиз, чунки бу фаолият олийжаноб вазифага – ҳарбий ҳаракатлар ва инсоний йўқотишларни тугатиш миссиясига эришишга қаратилган», деди Путин.

{Yii::t(}

Ўтказиб юбориш 6s

Ўтказиб юбориш

Россия президенти Владимир Путиннинг айтишича, Россия Украинада ўт очишни тўхтатиш таклифига рози бўлган, бироқ у узоқ муддатли тинчликка олиб келган тақдирдагина.

Сулҳ ҳақидаги таклиф бир қанча нюансларни ҳисобга олиши керак, деди президент. Хусусан, унинг сўзларига кўра, Киев 30 кунлик ўт очишни тўхтатиш режимидан қурол олиш ёки куч сафарбар этиш учун фойдаланиши хавфи бор.

«Биз ҳарбий ҳаракатларни тўхтатиш бўйича таклифларга қўшиламиз, лекин биз бундай тўхташ узоқ муддатли тинчликка олиб келиши ва инқирознинг асосий сабабларини бартараф этиши кераклигидан келиб чиқамиз», деди Владимир Путин.

Ўт очишни тўхтатиш келишувининг ўрнатилиши учун муҳокама қилиниши керак бўлган жиҳатларни санаб ўтаркан, Владимир Путин, Курск областидаги вазиятга ишора қилиб, фронт чизиғида вазиятнинг қандай тус олишига эътибор қаратди.

«Назорат ва текшириш масалалари қандай ҳал қилинади - улар бундай нарса [Украинанинг ҳужуми] бўлмаслигига қандай кафолат беради?», деди Путин.

Унинг сўзларига кўра, Курск областидаги вазият Украинани ўт очишни тўхтатишга рози бўлишга мажбур қилмоқда.

«Ҳудудимизга бостириб кирган ҳарбий гуруҳлар изоляция қилинган. Бу тўлиқ изоляция ва тўлиқ назорат. Агар яқин кунларда жисмоний изоляция бўлса, ҳеч ким умуман чиқиб кетолмайди. Фақат иккита йўл бўлади: таслим бўлиш ёки ўлиш. Ва шундай шароитда, назаримда, Украина томони камида 30 кун давомида ўт очишни тўхтатишга эришса, унинг манфаати учун жуда яхши бўлади», деди Владимир Путин.

Аввалроқ, Украина АҚШнинг Жиддадаги делегациялар ўртасидаги музокараларда 30 кунлик оташкесим ҳақидаги таклифини қабул қилди. Шундан сўнг Оқ уй Россия томони билан ўт очишни тўхтатиш имкониятини муҳокама қилиш режаларини эълон қилди. 13 март куни кечқурун Владимир Путин Москвага келган Доналд Трампнинг махсус вакили Стив Уиткофф билан музокаралар ўтказади. Учрашув ёпиқ форматда бўлиб ўтади.