Рубио: Европа Иттифоқи санкциялари Украина бўйича музокаралар мавзуси бўлиши мумкин

Европа Иттифоқининг Россияга қарши санкциялари масаласи АҚШнинг Украинада ўт очишни тўхтатиш бўйича таклифи юзасидан Москва билан музокараларда муҳим рол ўйнаши мумкин. АҚШ давлат котиби Марко Рубио 12 март, чоршанба куни журналистлар билан суҳбатда шундай фикр билдирди. Украина бўйича тинчлик музокаралари жараёнига европалик шерикларни жалб қилиш имконияти ва Вашингтоннинг бунга муносабати ҳақидаги саволга Рубио шундай жавоб берди: «Ўйлайманки, баёнотда (Америка ва Украина делегацияларининг Саудия Арабистонида бўлиб ўтган музокараларидан сўнг) улар (украиналиклар) европаликларни жалб қилиш зарурлиги масаласини кўтарган деб ўйлайман. Ва мен ишонаманки, россияликлар билан ҳар қандай музокараларда — агар биз уларга етиб борсак, (руслар) уларга қарши қўйилган Европа санкциялари масаласини кўтаради».

«Шундай экан, менимча, Украинада тинчлик бўлиши учун бу жараён якунида европаликлар санкциялар бўйича нима қилишлари ва ҳоказо ҳақида қандайдир қарор қабул қилишлари керак. Шунинг учун менимча, улар бу борада мутлақо (тинчлик музокаралари жараёнида) иштирок этишлари керак», деб тушунтирди АҚШ Давлат департаменти раҳбари.

АҚШ G7 йиғилишида Россияга қарши риторикадан қочишга чақирди

АҚШ 12-14 март кунлари Канаданинг Квебек провинцияси Шарлевуа шаҳрида бўлиб ўтадиган «Еттилик гуруҳи» (G7) давлатлари ташқи ишлар вазирларининг йиғилишида Россияга нисбатан «душманлик» риторикасини қўллашнинг олдини олмоқчи. Бу ҳақда 10 март куни АҚШ давлат котиби Марко Рубио маълум қилди. «Бизнинг фикримизча, душманона риторика баъзан музокараларда низолашаётган томонларни жалб қилишни қийинлаштиради», — дея унинг сўзларини келтиради AFP.

Шу билан бирга, Рубионинг сўзларига кўра, Украинадаги урушни тартибга солишда аниқ бир томонни қўллаб-қувватлаш ҳақида гап кетмаяпти. «Катта еттилик»нинг бошқа ташқи ишлар вазирлари бошқача фикрда бўлиши мумкин, аммо ҳозирда Вашингтон музокаралар ўтказиш имкониятини таъминлай оладиган ягона томон, деди АҚШ давлат котиби.

Аввалроқ Bloomberg агентлиги «Катта еттилик» қўшма баёноти лойиҳаси бўйича музокаралар чоғида АҚШ Хитойга нисбатан сўзларни қатъийлаштириш ва Россия Федерациясига нисбатан қоидаларни юмшатишни талаб қилгани ҳақида хабар берган эди. Хусусан, Вашингтон «санкциялар» сўзини олиб ташлашни, «Россиянинг Украинага қарши уруш олиб бориш қобилияти» деган сўзни «даромад олиш» сўзлари билан алмаштиришни талаб қилди. Бундан ташқари, агентлик томонидан кўрилган асосий коммюнике лойиҳасидан Россия тажовузкорлиги ҳақидаги ҳар қандай эслатма олиб ташланди. Бунинг ўрнига матнда ўт очишни тўхтатиш бўйича келишувга эришиш учун «барча саъй-ҳаракатлар» олқишланади, деб ёзади Bloomberg.