Кит Келлогг Кремль талабига биноан Украина бўйича музокаралардан четлатилди

АҚШ президенти Доналд Трампнинг Украина ва Россия бўйича махсус вакили Кит Келлогг музокаралардан четлатилди. Бунга Кремль талаби сабаб бўлди, деб ёзди NBC News.

Истеъфодаги генерал-лейтенант Келлогг яқинда Саудия Арабистонида Россия ва Украина расмийлари иштирокида бўлиб ўтган икки саммитда қатнашмади, гарчи музокаралар унинг ваколатига кирса ҳам.

Кремлга яқин бўлган юқори мартабали россиялик амалдорга кўра, Россия президенти Путин Келлоггни «ўта украинапараст» деб ҳисоблайди. «Келлогг Украинага жуда яқин бўлган собиқ америкалик генерал. У «бизнинг одам эмас, биз излаётган обрўга эга эмас», деди расмий.

Трамп маъмурияти расмийси Россия Келлоггнинг музокараларда иштирок этишини истамаганини тасдиқлади.

80 ёшли Келлогг аввалроқ Украинани қуроллантириш ва мудофаасини кучайтириш орқали урушни тугатишни таклиф қилган эди. Шу орқали «Россиянинг ўт очишни тўхтатиш ёки тинчлик келишувидан кейин яна олдинга силжимаслиги ёки яна ҳужум қилмаслиги» кафолатланишини таъкидлади.

18 февраль куни Ар-Риёзда АҚШ-Россия музокараларида Келлоггнинг ўрнига Давлат котиби Марко Рубио, миллий хавфсизлик бўйича маслаҳатчи Майкл Уолц, Марказий разведка бошқармаси директори Жон Рэтклифф ва Яқин Шарқ бўйича махсус элчи Стив Уиткофф иштирок этди.