Тошкентда попкорн сотувчиларини “паноҳига олган” профилактика инспектори пора олганликда айбланди

Тошкентда попкорн сотувчисидан пора олган профилактика инспекторига суд ҳукми ўқилди. Жиноий иш ЖИБ Чилонзор туман судида кўриб чиқилди.

Kun.uz танишган суд ҳужжатида келтирилишича, 1992 йилда туғилган Абдулазиз Абдуллаев Чилонзор тумани Ички ишлар органлари фаолиятини мувофиқлаштириш бошқармаси 2-сонли ИИБ ҲПБ профилактика инспектори лавозимида ишлаб келган. 

Абдулазиз Абдуллаев ўз хизмат мавқейидан фойдаланган ҳолда 2024 йил 24 август куни Magic City боғи олдида попкорн савдоси билан шуғулланаётган фуқародан уни ИИБга олиб кетмасдан қўйиб юбориш эвазига 100 минг сўм сўраган. Профилактика инспектори сўраган пулини ўзи фойдаланиб келган банк пластик картасига ўтказиб олган. 

Бундан ташқари, Абдулазиз Абдуллаев фуқаро А.Н.га Magic City боғи ва “Халқлар дўстлиги” санъат саройи атрофида попкорн савдоси билан шуғулланиб келган 4 нафар ишчисига “танка”лик қилишини айтган. Яъни уларга нисбатан чора кўрмаслик, рейд тадбирлари ҳақида олдиндан огоҳлантириб туриш, мабодо қўлга олинган тақдирда енгил жазо чораларини қўллашни ваъда қилган. Бу “хизмати” учун эса 2024 йилнинг 13 сентябр куни фуқаро А.Н.дан пора тариқасида 1,5 млн сўм олган. 

Шундан сўнг фуқаро А.Н. ҳолат юзасидан ИИВ Шахсий хавфсизлик бош бошқармаси Тошкент шаҳар бошқармасининг ишонч телефонига мурожаат қилган. Унинг мурожаати асосида шу куни шахсий хавфсизлик ходимлари томонидан профилактика инспекторидан 1,5 млн сўм пул маблағлари ашёвий далил сифатида олинган.  

Абдулазиз Абдуллаев суд мажлисида айбига иқрор бўлмаган. У олган 1,5 млн сўм пули аслида ўзининг попкорн савдосига тиккан пули эканини билдирган. Фойдаланувидаги банк пластик картасига 100 минг сўм пул ўтказган йигитни эса танимаслигини маълум қилган.

Профилактика инспектори ўз айбига иқрор бўлмаса-да, унинг қилмиши гувоҳлар кўрсатмалари ва бошқа далиллар билан ўз тасдиғини топган.

Суд ҳукми билан Абдулазиз Абдуллаев Жиноят кодексининг 210-моддаси (пора олиш) 2-қисми “а” банди билан айбли деб топилган. Унга 2 йил ҳуқуқни муҳофаза қилувчи органлар тизимида ишлаш ҳуқуқидан маҳрум қилинган ҳолда 5 йил озодликдан маҳрум қилиш жазоси тайинланган. Тайинланган озодликдан маҳрум қилиш жазоси шартли ҳисобланиб, 3 йил синов муддати белгиланган.